Munaıly óńirdegi barlyq densaýlyq saqtaý uıymdary kompıýterlik tehnıkalarmen jabdyqtalyp, ınternet jelisine qosylǵan. О́ńir turǵyndary 100 prosent elektrondy tólqujatpen qamtyldy. Oblystyq densaýlyq saqtaý basqarmasy basshysynyń orynbasary Madııar О́teshovtiń aıtýynsha, qaǵazsyz qujat aınalymyna ótý jumystary qarqyndy júrip jatyr. Al oblys turǵyndarynyń 25 prosenti mobıldik qosymshalardy paıdalanady.
Oblystyq qan ortalyǵynda «Infodonor» baǵdarlamasy engizildi. Bul joba basqa oblystardaǵy málimetter qorymen aqparat almasýǵa septigin tıgizip otyr. Jedel járdem beketinde «ADIS» baǵdarlamasy jańartylyp, iske qosyldy. 2017 jyldan bastap 39 medısınalyq uıymda medısınalyq aqparattyq júıe engizildi. Halyqty mobıldik qosymshalardy paıdalaný boıynsha aqparattandyrý maqsatynda 54 sıfrly saýattylyq postary quryldy.
Densaýlyq saqtaý basqarmasynyń málimeti boıynsha, ótken jyly «QazMedInform» baǵdarlamasy arqyly 2 871 558 adamǵa qyzmet kórsetilgen. Atap aıtsaq, 9873 medısınalyq qyzmetker osy baǵdarlamany paıdalanyp otyr, 395 413 elektrondyq dıagnostıkalyq jáne zerthanalyq zertteýler, 36 865 elektrondyq eńbekke jaramsyzdyq paraǵy, 89 238 elektrondyq resept jazý, 41 985 dıspanserlik esepte tirkeý, 626 256 elektrondyq densaýlyq tólqujatyn toltyrý, 97 741 jazbalar toltyrý etaptyq epıkrızder jasalǵan.
Atyraýda «Dárigerge» mobıldi qosymshasyn paıdalanýshylar qatary artyp keledi. Búginge deıin qosymshada 18 754 qoldanýshynyń jeke kabıneti tirkelgen. «Jeke kabınetteri arqyly 699 775 naýqas qabyldaýǵa jazylyp,
3 123 naýqas dárigerdi úıge shaqyrtty», deıdi M.О́teshov.
Jańa júıeniń tıimdi tustaryn turǵyndar da joqqa shyǵarmaıdy. Atyraý qalasynyń turǵyny Sandýǵash Nasıhatova dárigerge ınternet arqyly jazylýǵa daǵdylanǵanyn aıtady. Aldyn ala jazylǵan ýaqytta emhanaǵa kelip, talon alyp, dárigerge kiredi, bul óz kezeginde ýaqyt únemdeýge múmkindik beredi. №3 qalalyq emhananyń dırektory Aıman О́tegenova tirkelgen turǵyndardyń bárine elektrondyq densaýlyq tólqujaty ashylǵanyn jetkizdi. «Qazir naýqastar burynǵydaı ambýlatorlyq kartalaryn alyp júrmeıdi. Bári elektrondyq júıe arqyly júrgiziledi. Sıfrly júıeniń bir artyqshylyǵy, basqa medısınalyq mekemelerge barǵan kezde aýrý tarıhy elektrondyq qujatta saqtalyp turady. Sol arqyly dáriger aldyna kelip otyrǵan adamnyń densaýlyq jaǵdaıymen tolyq tanysa alady.
Oblystaǵy emhanalardyń barlyǵy elektrondy kezekke qosylǵan. «Sıfrly Qazaqstan» baǵdarlamasy aıasynda qolǵa alynǵan «Naýqastardy basqarý baǵdarlamasy» qanatqaqty jobasy da ómir sapasyn arttyrýǵa negizdelip otyr. Zertteýler baǵdarlamaǵa qatysqan naýqastardyń hal-jaǵdaılary jaqsarǵanyn kórsetken. Baǵdarlama oblys ortalyǵynda ǵana emes, aýdandarda da iske qosyldy. «Sonyń nátıjesinde ótken jyldarǵa qaraǵanda aýrýyn asqyndyryp baryp dárigerdiń kómegine júginýshiler sany eki esege azaıdy. Baǵdarlamaǵa qant dıabeti, qan qysymynyń joǵarylaýy sııaqty sozylmaly naýqastardan zardap shegip júrgen 300-ge jýyq naýqas qatysty», deıdi oblystyq densaýlyq saqtaý basqarmasy basshysynyń orynbasary M.О́teshov. Jasyratyny joq, qant dıabeti, júrek-qan tamyrlary aýrýlary men qan qysymynyń joǵarylaýynan zardap shegetin atyraýlyqtardyń sany 35 myńǵa jýyq. Jańa úrdispen emdelýge nıettiler sany da sáıkesinshe kóbeıýde. Osy maqsatta arnaıy kýrs ashylyp, medısına qyzmetkerleri qaıta daıyndyqtan ótkizildi.
Salany sıfrlandyrý aıasynda «Men − anamyn», «Pasıent kabıneti», «Patronajdyq medbıke» mobıldi qosymshalary qoldanysqa engiziledi. Sıfrly baǵdarlamalar negizinde táýlik boıy halyqpen qarym-qatynas ornatý júıeleri jumys istep tur. Egov.kz saıty arqyly portalǵa jazylý nemese uıaly telefonnan mobıldi qosymsha arqyly dárigerge jazylýdyń mán-jaıyn túsindirý úshin emhanalarda arnaıy oryndar uıymdastyrylǵan.
– Elbasy tapsyrmasyna sáıkes oblystaǵy 35 memlekettik medısınalyq nysan qaǵazsyz jumys isteýge kóshti. Sıfrlandyrý arqyly turǵyndarǵa kórsetiletin dárigerlik kómek sapasy jaqsarady, qyzmetkerlerdiń esep jazýdan qoly bosap, naýqasqa kóbirek kóńil bóledi. Aqparattyq júıege kirigý úrdisi jalǵasady, birinshi jartyjyldyqtyń sońyna qaraı nysandardy sıfrlandyrý aıaqtalady, − deıdi respýblıkalyq elektrondyq densaýlyq saqtaý ortalyǵy Atyraý oblystyq fılıaly dırektorynyń orynbasary Aıkerim Ábilhatqyzy. − Bul joba alys aýyldaǵy halyq úshin de yńǵaıly. Turǵyndardyń onlaın-monıtorıng arqyly densaýlyǵyna, ásirese sozylmaly aýrýǵa shaldyqqan naýqastardyń óz jaı-kúıine mán berýi joǵarylaıdy. Sondaı-aq qoljetimdilikti arttyrý maqsatynda «Halyqtyq baqylaý» sekildi mobıldi qosymshalar jasaldy.
Call-ortalyqqa táýlik boıyna habarlasýǵa bolady, sondaı-aq shaǵymdarǵa jaýap berý ýaqytyn jedeldetý úshin «WhatsApp» áleýmettik jelisi qosyldy. Bul jumystardyń bári de halyqtyń densaýlyǵyn saqtaýǵa, medısınalyq qyzmettiń qoljetimdiligin jáne ómir sapasyn arttyrýǵa negizdelgeni memlekettik baǵdarlamanyń máni zor ekenin kórsetedi.
Baqytgúl BABASh,
«Egemen Qazaqstan»
