Byltyr mektep ashanalarynyń birqatar ózekti máselesin sheshý jáne ata-analar komıtetiniń, ashanalardy jalǵa alýshylardyń, mektep ákimshiligi men Bilim basqarmasy ókilderiniń is-áreketin úılestirý úshin «Nur Otan» partııasy «Mektep ashanalary» jobasyn ázirlegen edi. Jobany júzege asyrý maqsatynda óńir mektepterindegi ashanalarǵa monıtorıng júrgizilip keledi. Mektep ashanalaryndaǵy taǵamdardyń sapasy men ashana standarttaryn tekserý máselesi boıynsha arnaıy saraptamalyq top tamaqtaný oryndarynyń jaı-kúıimen tanysty. Sarapshylar taǵam sapasyn, sanıtarlyq erejelerdiń saqtalýyn, baǵalar men tıisti qujattamalardy tekserip shyqty.
– Mektepke arnaıy sarapshylar kelip, ashana jumysymen tanysty. Eshqandaı eskertý aıtylǵan joq. Kúnine shamamen 220 oqýshyny tamaqtandyramyz. Balalardyń durys tamaqtanýyna shama-sharqymyzsha tyrysyp júrmiz, – deıdi «Flıýra» jeke kásipkerliginiń dırektory Lılııa Jetpisova.
Oqýshynyń durys tamaqtanýynyń mańyzy zor. Sol sebepti tekseristen ótken úsh mektepte oqýshylardyń tamaqtanýyna arnaıy keste tizip, jyldam ári sapaly as ishýine jaǵdaı jasaǵan. О́ńir mektepterindegi ashanalardy tekserý barysynda óreskeler qatelikter men ereje buzýshylyqtar baıqalǵan joq.
Bir aıta keterligi, sarapshylar mektepterge eskertýsiz monıtorıng júrgizedi. Mundaı is-áreket olardyń kúndelikti jumysynyń nátıjesin shynaıy baǵamdaýǵa septigin tıgizedi. Qazirgi ýaqytta qaladaǵy 13-ke jýyq mekteptiń ashanasyna monıtorıng júrgizildi. Monıtorıng barysynda sarapshylar ashana basshylaryna keńes berip, jumys sapasynyń odan ári jaqsarýyna múmkindik týǵyzýda.
Baıqal BAIÁDIL,
«Egemen Qazaqstan»
Kókshetaý qalasy
