Elbasy memlekettik jáne salalyq baǵdarlamalardy ýaqtyly ári sapaly iske asyrýdyń, sondaı-aq halyqtyń ál-aýqatyn odan ári arttyrý úshin sharalar qabyldaýdyń mańyzdy ekenin atap ótti.
– Qostanaı oblysynyń makroekonomıkalyq kórsetkishteriniń ósý qarqyny saqtalyp otyr. 2017 jylmen salystyrǵanda ónerkásip óndirisi 8,3 paıyzǵa, qurylys salasy 22,3 paıyzǵa ósip, 300 myń sharshy metrge jýyq turǵyn úı paıdalanýǵa berildi, – dedi A.Muhambetov.
Sonymen qatar, Qostanaı oblysynyń ákimi Qazaqstan Prezıdentine avtomobıl óndirisin damytý, ınvestısııa tartý jáne ındýstrııalyq jobalardy iske asyrý jumystarynyń nátıjeleri týraly málimdedi.
– Oblysta ındýstrııalyq aımaq qurylýda. Sonyń aıasynda 11 joba ázirlenip jatyr. Sonyń ishindegi eń irisi – aýyl sharýashylyǵy habyn qurý. Onyń quramyna 600 myń tonnalyq qýaty bar arnaıy maqsattaǵy un óndiretin, jylyna 1 mıllıon tonna jem daıyndaıtyn, glıýten óndiretin jáne maıly daqyldardy qaıta óńdeıtin sehtar kiredi. Bul joba aýyl sharýashylyǵyndaǵy ónimdilikti arttyrýǵa baǵyttalǵan, – dedi A.Muhambetov.
Qostanaı oblysynyń ákimi aýyl sharýashylyǵy tehnıkasyn óndirý, qurylys materıaldaryn shyǵarý, Arqalyq qalasyndaǵy et óńdeý keshenin damytý salalaryna qatysty jobalardy júzege asyrý, sondaı-aq shaǵyn jáne orta kásipkerlikti qoldaý sharalary jóninde aıtty.
Kezdesý sońynda Nursultan Nazarbaev birqatar naqty tapsyrma berdi.
