Memlekettik qyzmetshiler jumys ornynda atshaptyrym kabınet, artyq alań paıdalanbaýy tıis. Mundaı alań bolsa, ony tıimdi qoldanyp, ózge memlekettik mekemelerge nemese jeke qurylymdarǵa jalǵa berýi tıis. Osy arqyly memleket qarjysyn únemdeýge jáne kiris kirgizýge bolady.
Qazaqstandaǵy memlekettik qyzmetshiler ártúrli deńgeıine baılanysty qyzmet alańymen qamtylýy kerek. Mysaly, qarapaıym qatardaǵy qyzmetshige 7,5 sharshymetr jumys orny tıesili bolsa, aýyl ákimi – 15, aýdan ákimi – 36, oblys ákimi – 54 sharshymetrden artyq kabınetti paıdalana almaıdy. Munyń bári Qazaqstan Respýblıkasy Qarjy mınıstriniń 2015 jylǵy 17 naýryzdaǵy «Memlekettik organdardy qyzmettik jáne kezekshi avtomobıldermen, telefon baılanysymen, keńse jıhazymen jáne memlekettik organdardyń apparatyn ornalastyrý úshin alańdarmen qamtamasyz etýdiń zattaı normalaryn bekitý týraly» №179 buıryǵymen bekitilgen.
- Osy buıryq sharttarynyń qalaı oryndalyp jatqanyn anyqtaý úshin jaqynda Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Batys Qazaqstan oblysy boıynsha Departamenti arnaıy úsh top quryp, oblystaǵy memlekettik organdar paıdalanyp otyrǵan artyq alańdardy anyqtaý boıynsha jumys júrgizdi, - deıdi osy departament basshysynyń orynbasary Amanqos Jubanysh.
Tekserýge oblys aýmaǵyndaǵy 459 memlekettik organ qamtylǵan. Nátıjesinde oblystyq memlekettik mekemelerde 4433 sharshymetr, qalalyq organdarda – 1519, aýdandyq atqarý organdarynda 17829 sharshymetr alań artyq paıdalanylyp otyrǵany anyqtalǵan. Alaıda osy kólemniń 10 myń sharshymetrge jýyq bóligin ǵana ońtaılandyrý, ıaǵnı únemdi paıdalanýǵa bolady. Al qalǵan 12475 m2 alań bólme bólikterinen turady. Ǵımarattar eski, bólmeler standartqa saı emes, ony qaıta jasaqtaý tıimsiz, qarjy shyǵyny aqtalmaıdy. Aýylda, alys eldimekenderdegi artyq alańdy jalǵa alýshy joq. Keıbir kóne ǵımarattar HIH ǵasyrdyń tarıhı eskertkishi retinde memlekettik qorǵaýǵa alynǵandyqtan, ol jerde bólmelerdi qaıta bólýge múldem bolmaıdy.
- Ońtaılandyrýǵa jatady degen 9666 sharshymetrlik alańnyń 1962 sharshymetrin qysqartyp, qazirdiń ózinde jylyna 2,5 mln teńgeden artyq qarjy únemdedik. Josparymyz tolyq júzege assa, jylyna 16,7 mln teńgeni únemdeımiz, - deıdi Amanqos Saǵynuly.
2018 jyldyń qorytyndysy boıynsha Batys Qazaqstan oblysynyń jergilikti atqarýshy organdary óz ıeligindegi 4,4 myń sharshymetr alańdy 70 kásipkerge jalǵa berip, memleket qazynasyna 13,8 mln. teńge paıda túsken. Biraq birqatar memlekettik organ 2,1 myń sharshymetr alańdy ózgelerden jalǵa alyp, ol úshin 36,3 mln. teńge qazyna qarjysyn shyǵyndaǵan.
Memlekettik qyzmet salasy qarjy shyǵyndaryn únemdeý isi bıyl jyl basynan beri qatań qolǵa alynypty. Máselen, Aqjaıyq aýdandyq jer qatynastary bólimi buǵan deıin «Nur Otan» partııasynyń ǵımaratynan 45,5 sharshymetr alańdy jalǵa alyp, ol úshin jylyna bıýdjetten 1 061 428 teńge tólep kelse, bıylǵy 1 qańtardan bastap aýdan ákimdigi ǵımaratynan oryn tapty. Al Aqjol, Almaly, Bazarsholan, Jambyl, Jańabulaq, Qabyrshaqty, Qaraýyltóbe, Kónekketken, Qýraılysaı, Mergen aýyldyq okrýgteri bos alańdaryn «Qazposhta» mekemesine, jastar resýrstyq ortalyqtaryna, polısııa beketi men mal dárigeri mamandaryna berý arqyly qosymsha tabys taýyp, ǵımarattarynyń bos turyp, azyp-tozýynan qutqardy.
Sondaı-aq Qaratóbe aýdandyq máslıhaty ózine qarasty ǵımaratta kabınetterdi qaıta bólý jumysyn júrgizip, jańadan paıda bolǵan eki bólmege mal dárigerlik bólimi mamandary men qoǵamdyq keńes tóraǵasyn ornalastyrǵan. Osy arqyly bıýdjettiń 1,02 mln teńgesi únemdelipti. Terekti aýdandyq kásipkerlik bólimi de eki kabınetin jalǵa alýshylarǵa bosatyp berip, jylyna 499 myń teńge únemdegen.
Sońǵy úsh jyl ishinde óńirdegi memlekettik mekemeler otyrǵan alańdardy ońtaılandyrý nátıjesinde 5456,8 sharshymetr únemdelgen eken. 2016-2019 jyldar arasynda kabınet jáne kólik shyǵyndary úshin 54 mln teńge bıýdjet qarjysy únemdelgen.
- О́tken jyly Memlekettik qyzmet isteri jáne sybaılas jemqorlyqqa qarsy is-qımyl agenttiginiń jergilikti fılıalymen birige otyryp memlekettik organdar múlki men shyǵyndaryn tolyq tizimdep shyqtyq, - deıdi QR Qarjy Mınıstrligi Memlekettik múlik jáne jekeshelendirý Komıteti BQO memlekettik múlik jáne jekeshelendirý departamentiniń basshysy Ermek Súıerbaev.
Barlyǵy 110 memlekettik mekemeni qamtyǵan ınventarızasııa jumysy nátıjesinde artyq paıdalanylyp otyrǵan 4312 sharshymetr alań qaıtarylǵan.
Qazaqstanda memlekettik laýazymdy tulǵalarǵa atqarǵan qyzmeti úshin halyqtan syılyq alýǵa tıym salynǵan. Tártip boıynsha mundaı syılyq jergilikti atqarýshy organǵa bir apta ishinde tapsyrylýy tıis. Sońǵy úsh jyl ishinde batysqazaqstandyq sheneýnikter osyndaı 48 syılyqty memleketke tapsyrǵan. «Ol syılyq arnaıy baǵalaýdan ótken soń saýdaǵa shyǵarylyp, bıýdjetke 2,5-3 mln teńgedeı tabys tústi» deıdi Ermek Súıerbaev. Syılyqtardyń ishinde syıqadeler, araq-sharap, konfet jáne basqa nárseler bolypty.
Qazbek QUTTYMURATULY,
«Egemen Qazaqstan»
Batys Qazaqstan
