Qaraǵandy oblysynda mektep janyndaǵy ınternattardyń kóp jyldan beri jóndeý kórmeı, júdeý kúı keship kelgeni kún tártibinde ótkir turǵan máselelerdiń biri-tuǵyn. Degenmen, ótken jyly qolǵa alynǵan jumystardyń nátıjesine qarap, búginde atalǵan máseleniń túpkilikti sheshim tapqanyn nyq senimmen aıtýǵa bolady.
Taıaýda Osakarov aýdanynda jumys saparymen bolǵan oblys basshysy Erlan Qoshanov óńirdegi barlyq ınternattyń jóndeýden ótkenin málimdedi.
– Prezıdenttiń tapsyrmasy boıynsha oblysymyzdaǵy ınternattardyń barlyǵyn qalpyna keltirdik. Olar kópten beri jóndeýdi qajet etken bolatyn, sondyqtan biz birinshi kezekte osy máselege kóńil aýdardyq, – dedi E.Qoshanov.
Qaraǵandy oblysynda orta mektepter janynda barlyǵy 21 ınternat jumys isteıdi. Búginde olardyń 12-si kúrdeli jóndeýden, qalǵany aǵymdaǵy jóndeýden ótken.
Osakarov aýdanynda bolǵanynda oblys basshysy №12 jalpy bilim berý mektebiniń janyndaǵy ınternattyń tynys-tirshiligimen tanysty. Bir jyl buryn apatty jaǵdaıda bolǵan mekemege qazir 114 mln teńgeniń jóndeý jumystary júrgizilgen.
– Bul jerde meniń úsh balam turyp jatyr. Qazir kóńilimde alań joq, sebebi munda úıdegideı jaǵdaı jasalǵan. Ǵımarat jaıly jáne jyly. О́skeleń urpaqqa úlken kóńil bólip jatqany úshin Prezıdentimizge alǵysymdy bildiremin, – deıdi ınternat oqýshysynyń anasy Oksana Kovaleva aǵynan jarylyp.
Sapar barysynda óńir basshysy aýdan ortalyǵyndaǵy balalardyń bos ýaqyttaryn qalaı ótkizetindigin de nazardan tys qaldyrmady. Osakarov aýdandyq Bilim bóliminiń basshysy Aınagúl Aqmanbetovanyń aıtýynsha, oqýshylar bos ýaqytynyń kóbin osyndaǵy qosymsha bilim berý ortalyǵynda ótkizedi eken. Munda olar mýzykalyq úıirme, qýyrshaq teatry jáne basqa da kóptegen seksııaǵa qatysady. Aldaǵy ýaqytta mekemeni jańǵyrtyp, úıirmelerdiń sanyn kóbeıtý de josparda bar.
Qaırat ÁBILDA,
«Egemen Qazaqstan»
Qaraǵandy oblysy
