О́skeleń urpaqtyń bazbir ókilderi aq joldan adasyp, zalym kúshterdiń, jat aǵymdardyń jeteginde ketip jatatyny bar. Elbasynyń Jastar jyly saltanatynda ataqty «Jýsan» operasııasy týraly sóz qozǵaýy, jastardy bostan basyn bodan etýden saqtandyrýy da osydan.
El tarıhynda eleýli oqıǵa retinde qalar osy mańyzdy jyldyń ashylý rásiminde Qazaqstan Prezıdenti óskeleń urpaqtyń daryndy ókilderine, jas kásipkerler men ınnovatorlarǵa, jas otbasylarǵa irgesi bekip, býyny qataıǵansha qoldaý kórsetý boıynsha kóptegen tyń tapsyrmalaryn, jańa bastamalaryn jarııa etti. Memleket basshysy byltyr óz bastamasymen qurylǵan «Jas sarbaz» qozǵalysy negizinde Qazaqstanda áskerı-patrıottyq tárbıe berý isin damytýdy júktedi. Sondaı-aq Úkimetke 2025 jylǵa deıingi áskerı-patrıottyq tárbıe berý baǵdarlamasyn ázirleýdi tapsyrdy.
«Jas sarbaz» respýblıkalyq balalar men jasóspirimderdiń áskerı-patrıottyq qozǵalysynyń qurylýyna bizdiń Aýǵan ardagerleri jáne ózim basqaratyn «Qazaqstan Ardagerleri» qaýymdastyǵy belsendi atsalysty, endi onyń qazirgi jumystaryn ilgeriletýge úles qosýda. Men máselen, «Jas sarbaz» RQB úılestirý keńesi tóraǵasynyń orynbasarymyn.
Búginde Elbasy qoıǵan mindetter men tapsyrmalardy oryndaý maqsatynda Qorǵanys mınıstrligimen birge, «Jas sarbaz» qozǵalysynyń respýblıkalyq jáne óńirlik deńgeılerdegi is-sharalarynyń jospary bekitildi. Onyń aıasynda «Jastar – Otanǵa» lagerleri, «Jigerli jas sarbaz» jáne basqa da iri jobalar qolǵa alynýda. Al «Áskerdegi kúnder» jobasy sheńberinde jasóspirimder eki kúnge áskerı bólimderge baryp, jaýyngerlerdiń tynys-tirshiligimen tanysady, qarý túrlerin bólshektep, qaıta jınaýdy úırenedi, el qorǵaýdyń mánisi men mańyzyna qanyǵady. «Áskerdegi kúnder» ár aımaqta jyldyń ár mezgilinde bir retten uıymdastyrylady. Mysalǵa, kóktemde – naýryz, al jazda – shilde aıynda ótkiziledi.
Budan ózge, árıne Uly Otan soǵysy jáne Aýǵan soǵysy ardagerleriniń taǵylymy men ulaǵatyn, aqyly men keńesin tyńdaý úshin jaı kezdesýler ǵana emes, balalardyń olarmen jaqyn aralasýy, bos ýaqyttaryn ardagerlermen ótkizýi jolǵa qoıylady. «Jas sarbazdyń» barlyq óńirlerde tól jelileri bolady. Qozǵalys munyń syrtynda jastardy óz qataryna kóptep tartý úshin óz qyzmetinde áleýmettik jelilerdi, youtube-arnalardy keńinen paıdalanady.
Jalpy, «Jas sarbaz» qozǵalysynyń basty maqsaty – barlyq óńirlerimizdegi jas qazaqstandyqtarǵa óz áleýetterin júzege asyrýyna járdemdesý, olarǵa órshil batyrlarymyz úlgisinde patrıottyq tárbıe berý, boılaryna Otanǵa degen súıispenshilikti egý, rýhanı kemeldikke alǵashqy qadamyn jasaýyna septesý bolyp tabylady.
Baqytbek SMAǴUL,
«Qazaqstan Ardagerleri» qaýymdastyǵynyń tóraǵasy, Májilis depýtaty
