Oblys ákimi baspasóz qyzmetiniń málimdeýinshe, sıfrlandyrý aıasynda oblys kásiporyndary quny 5 mlrd teńge turatyn 11 jobany iske asyrǵan. Jobalardy iske asyrý barysynda ónimderdiń qunyn tómendetý, Otandyq ónimdi tutynýdy saraptaý jáne baqylaý qolǵa alyndy.
Qazirgi ýaqytta elektr energııasyn esepke alýdyń kommersııalyq júıesin, ártúrli basqarý júıelerin, GPS, atmosferalyq jáne kommýtasııalyq qatty kúsh berýden qorǵaıtyn qurylǵylardy jáne taǵy da basqalary avtomattandyrylǵan sandyq júıede jumys jasaýda.
Mysaly, bul maqsat - «Eýroazıattyq energetıkalyq korporasııasy» AQ, «Kaýstık» AQ, «Maıqaıyńaltyn» AQ, «ERG Service» AQ-nyń fılıaly – Mashınaqurastyrý zaýyty, «Pavlodar munaı-hımııa zaýyty» JShS, «Qazaqstan elektrolız zaýyty» AQ, «Qazaqstan alıýmınııi» AQ jáne «Prommashkomplekt» JShS-da sátti júrgizilýde.
Bıyl kásipkerlikti qoldaý kartasynyń 3 jobasyn iske asyrý josparlanýda. Aqsýdaǵy «Eýroazıattyq energetıkalyq korporasııasy» AQ-na qarasty №5 energoblok qaıta jańǵyrtylmaq.
Sondaı-aq, qum bloktaryn shyǵaratyn óndiris orny ashylmaq. Kásiporyndar tehnologııalyq jańǵyrtý jáne sıfrlandyrý boıynsha jumystardy qolǵa alýda.
О́ńirimizdegi iri óndiris oryndary 2025 jylǵa deıin tehnologııalyq turǵydan jańǵyrýǵa, sıfrlandyrý elementterin engizýmen aıaqtalýy merzimderi ártúrli 40 jobany iske asyrmaq.
Mysaly, oblys ortalyǵyndaǵy «Munaı-hımııa zaýyty» JShS jabdyqtarǵa qyzmet kórsetý jáne jóndeýdiń avtomattandyrylǵan júıesine kóshpek. Eńbek ónimdiligin arttyryp, óndiristik shyǵyndardy birshama azaıtady.
Bıyl óńirde dıspetcherlik jáne avarııalyq-qutqarý qyzmetterin, geografııalyq aqparattyq júıelerdi, qoǵamdyq kólikte elektrondy bıletterdi satý júıesi engiziledi.
Sonymen qatar, jol qozǵalysy erejelerin buzýshylyqty foto jáne beıne jazbalar arqyly tirkeý jáne beıne-analıtıkany jedel basqarý úshin arnaıy ortalyq qurý josparlanýda.
Farıda BYQAI,
«Egemen Qazaqstan»
PAVLODAR
