-Búgin Shákárim Qudaıberdiulynyń ómiri men shyǵarmashylyǵyna arnalǵan «Mutylǵannyń taǵdyry» atty saıys uıymdastyryp otyrmyz,-dedi Abaıdyń memlekettik qoryq-mýzeıi dırektorynyń ǵylymı jumystar jónindegi orynbasary Meıramgúl Qaırambaeva,-atalmysh sharaǵa Nursultan Nazarbaevtyń qatysýymen ashylǵan «Jastar jylynyń» saltanatty rásimine qatysqan jerlesimiz, jas aqyn, «Daryn» memlekettik jastar syılyǵynyń laýreaty Mereı Qart bilim saıysynyń qurmetti qonaǵy retinde qatysty. Jastarǵa óziniń aqjarma tilegin jetkizdi. Sondaı-aq, úmitterin úkilep kelip otyrǵan saıyskerlerge sáttilik tiledi.
Meıramgúl Qaırambaevanyń aıtýynsha, dástúrge aınalǵan dúbirli saıysty ótkizýdegi basty maqsat – Abaıdyń aqyn shákirti, jazýshy, tarıhshy, aýdarmashy, fılosof, sazger Shákárim Qudaıberdiulynyń ómirin, onyń murasyn ásirese, aýyl jasóspirimderi arasynda tereń bilýge yntalandyrý jáne keńinen nasıhattaý.
Saıysqa aldyn-ala taǵaıyndalǵan ádil qazylar quramynda Abaıdyń «Jıdebaı-Bórili» memlekettik qoryq-mýzeıi dırektorynyń ǵylymı jumystar jónindegi orynbasary Meıramgúl Qaırambaeva, Shákárim atyndaǵy gınazııanyń qazaq tili men ádebıeti pániniń muǵalimi Asqar Bekqasymov, qalalyq bilim bóliminiń ádiskeri Nurgúl Baısarına boldy.
Abaıdyń memlekekettik qoryq mýzeıi baspasóz qyzmetiniń mamandary ádilqazylar alqasynyń sheshimin saıys qorytyndysy boıynsha jarııa etti. Sonymen I-oryndy Jarqyn mektebiniń oqýshysy Erkejan Motysheva, II-oryndy Znamenka mektebiniń oqýshysy Ernat Faızýllaev, III-oryndy №49 mektep oqýshysy Nazym Amangeldi qanjyǵalaryna baılady. Saıysta kórermenderdi óz ónerimen tánti qylyp, kózge túsken №23 mektep oqýshysy Aqbota Serikqazınova «Kórermen kózaıymy» nomınasııasyna ıe boldy.
Raýshan QABJANQYZY
«Egemen QAZAQSTAN»
Semeı
