Bilimi men biliktiligine senetin ol oqýyn támamdap, elge kelgen soń túrli kedergilerge tap keledi. Bilimine saı jumys tabylmaı, tapqan kúnniń ózinde mardymsyz jalaqy alady. Keıin óz elinen jaıly ómir súretin aqsha tappasyna kózi jetken Qanat basqa elde jumys isteýge bel býady. Negizgi jospary Ońtústik Koreıaǵa ketý bolatyn. Sapardy sáýirge josparlap otyrǵan edi. Biraq tanystary qysta ketýge úgittep, ózderimen birge alyp ketedi. Phenchhanda ótip jatqan Olımpıada qarsańynda týrıst retinde shekara asý qıyndyq týdyrmady.
Koreıaǵa jetken soń, álgi tanystary ózin aldap alyp kelgenderin, eshqandaı jumys ta, úı de joǵyn túsinedi. «Bálen jerde altyn bar, barsań, baqyr da joq» degenniń keri kelipti. Eki aı boıy eki qolǵa bir kúrek tappaı qınalyp, kóktem shyǵa sala áıteýir bir jumys tabady. Jalpy, sheteldikter úshin jumys naýqany kóktemniń sońynda, jazda bastalady eken.
Jumys izdeý de ońaı sharýa emes. О́ıtkeni áleýmettik jelide jumys taýyp beremin degenderge senip, basqa qalaǵa baryp, ol jaqta eshkimdi tappaı aldanyp qalǵandar kóp. Deldaldardyń qyzmetteri úshin alatyn óz komıssııasy da bar eken. Onyń quny – 200 AQSh dollarynyń shamasynda. Sondyqtan Qanat jumys taýyp berýshimen komıssııaǵa tólenetin aqshany alǵashqy jalaqydan berýge kelisim jasasqan durys ekenin aıtady.
Aıtpaqshy, álgindeı «deldaldardyń» arasynda ózimizdiń qazaqtar da bar. О́kinishke qaraı, sheteldikterden buryn ózimizdiń qandastar jıi san soqtyryp ketedi eken...
«30 kúnnen keıin ruqsat alý kerek. Kóshi-qon polısııasynan tyǵylyp, dúkenge bara almaǵan kúnderimiz de boldy, – dep eske alady Qanat Koreıadaǵy kúnderin. – Sońǵy kezderi tekseris jıilep ketti. Ondaı kezderde úıden shyqpaımyz. Al jumys berýshiniń budan habary bar».
Qanat Úlken Kvandjý qalasyndaǵy et kombınatyna jumysqa ornalasady. Alǵashynda jumysqa 13 qazaqstandyq kiripti, biraq keıinnen eki-aq adam qalǵan. Qalǵandary tártip buzyp jumystan shyǵyp ketken.
«Koreıada Eýropaǵa qaraǵanda jalaqyny jaqsyraq tóleıdi» Keıipkerimizdiń Koreıany tańdaǵany da sondyqtan eken.
«Ol elde jylyjaıda isteıtinder jumystyń qolaısyzdyǵynan, aýyrlyǵynan qaza taýyp jatady. Bıyl jazda eki sheteldiktiń qaza tapqanyn estidim» deıdi Qanat Ahmetov.
Jat jerde jumys isteýge kelgen sheteldikter úıdi birigip jaldaıdy. Qanattyń aıtýynsha, jumysshylar arasynda Ýkraına, Reseı, О́zbekstan, Taıland azamattary basym.
«Meniń oıymsha, shetelde aqsha tabýǵa múmkindik kóp. О́ıtkeni istegen jumysyńa qaraı jalaqyń da jaqsy. Al Qazaqstanda, onyń ústine Astanada bir adamnyń jalaqysyna otbasyńdy asyraý qıyn. Sondyqtan materıaldyq jaǵdaıymdy kóterý úshin osy joldy tańdadym. Nıeti, armany bar adamǵa dúnıeniń qaı jerinde bolsa da shekteý joq dep oılaımyn» deıdi nápaqasyn Koreı elinen taýyp júrgen jigit.
Qosymsha qarjy tapqan jaqsy árıne. Alaıda bizdiń keıipkerimiz «ózge elde sultan bolǵansha, óz elinde ultan bolýdy» kózdeıdi. Sondyqtan jaqyn arada elge oralmaq oıy bar ekenin aıtty.
Svetlana ǴALYMJANQYZY,
«Egemen Qazaqstan»
