Jas Sýretshiler odaǵy jasap shyqqan aıryqsha art-nysan kóne shahardyń ótkeni men búginin sabaqtastyryp turǵandaı áserge qaldyrady. Týyndygerlerdiń bul ıdeıasyna Sháken Aımanovtyń 1957 jyly jaryq kórgen «Bizdiń súıikti dáriger» fılmindegi sary «Moskvıch» arqaý bolypty.
«Gazdar»-«Mazdar»,
«Moskvıchter», «Volgalar»,
Zýla-zýla, zýla temir jorǵalar» – dep bir kezderi Muqaǵalı óleńge qosqan mundaı kólikterdi ilýde bireý bolmasa, qazir qala kóshelerinen kezdestire bermeısiz. Al kólik kabınasyna lyq toltyrylǵan jasandy jemis Almatynyń ásem aportyn eske salardaı. Shahardyń ázelgi turǵyndary ol kezderi qazirgideı aǵylyp jatqan kólik joq edi, osyndaı kólikter men tańnan keshke deıin tynym tappaıtyn tramvaılar kóshelerdiń sáni bolatyn dep eske alady. Zaman aǵysyna saı tramvaılar da kózden tasa bolyp, onyń ornyn jerasty metrolary men júrdek avtobýstar basqaly qashan. Turǵyndar bul óner týyndysyn kózden ketse de kóńilden ketpeıtin syrly sátterge, jastyq mekeniniń janǵa jaıly shaqtaryna sapar shektiretin áserli estelik dep esepteıdi.
О́tkennen nár almaı erteńińdi elestetý múmkin emes. Osyny eskergen myń boıaýly megapolıs ejelgi Alma mádenıetin ózine qaıtarǵysy keletindeı. Byltyr shaharda tuńǵysh ret Alma mýzeıi ashylǵan bolatyn. Almaǵa qatysy bar ańyzdar men ertegiler, almanyń álemge qalaı taraǵany týraly áńgimeler, baqshashylyq jáne almanyń tasasyndaǵy tylsym mánderge boılatatyn tyń aqparattardyń barlyǵyn osy jerden tabýǵa bolady. Dámi túgil túri de esimizden shyǵýǵa shaq qalǵan álem tanyǵan Almaty aporty sońǵy ýaqyttary qaıta jańǵyrtyla bastaǵanyn gazetimizdiń ótken sandarynyń birinde súıinshilegen edik.
Al qala kóshesinde oqshaýlanyp turǵan alma toltyrylǵan sary «Moskvıch» ákelerimizdiń stýdenttik sátteriniń sarǵaıǵan saǵynyshy sekildi elesteıdi.
Arman OKTIаBR,
«Egemen Qazaqstan»
ALMATY
