Zaýyttyń №16 jóndeý-mehanıkalyq sehynda bolǵan Májilis tóraǵasyna seriktestik basshysynyń orynbasary Núrzııa Lesbekova kásiporynnyń búgingi jumysy týraly baıandady. Ol ótken jylǵy atqarylǵan jumystar jóninde maǵlumat berip, aldaǵy josparlarmen de bólisti. Sonymen qatar, Nurlan Nyǵmatýlın kásiporyn jumysshylarymen kezdesip, Elbasy Joldaýyndaǵy basym baǵyttar men naqty mindetterge toqtaldy. Kezdesý barysynda Májilis tóraǵasy Elbasy Joldaýynda aıtylǵan kásiporyn jumysshylarynyń jalaqysynyń ósýi, «7-20-25» baǵdarlamasy aıasynda baspanaly bolý sekildi birqatar jaıtty áńgimeledi.
«Qazfosfat» JShS ótken jyldyń qorytyndysy boıynsha 112,1 mıllıard teńgeniń ónimin óndirgen. Kásiporyn ónimderi Germanııa, AQSh, Danııa, Shveısarııa, Polsha, О́zbekstan, Nıderlandy jáne ózge de memleketterge eksporttalady. Jambyl óńirine jumys sapary barysynda Májilis spıkerine óńirdegi alyp kásiporynnyń tynysy tyńǵylyqty baıandaldy.
Budan keıin Nurlan Nyǵmatýlın M.H.Dýlatı atyndaǵy Taraz Memlekettik ýnıversıtetine kelip, belsendi jastarmen kezdesti. Bes júzden astam jas qatysqan jıynda Májilis tóraǵasy búgingi jastardyń táýelsizdiktiń rýhymen ósip kele jatqanyn aıtyp, kúni keshe ǵana Elbasynyń qatysýymen Astana tórinde ótken «Jastar jylynyń» ashylýymen quttyqtady.
«Árbir eldiń, árbir memlekettiń bolashaǵy - jastar. Sondyqtan biz «Jastar jyly» aıasynda mańyzdy kezeńde kezdesip otyrmyz. Bıylǵy jyldyń jastarǵa jańa qýat, jańa jiger, jańa kúsh beretinine senim mol. Memlekettiń qoldaýynyń nátıjesinde Jambyl oblysyndaǵy barlyq joǵary oqý oryndarynda sapaly bilim berýge tolyq múmkindikter bar. Sonymen qatar, Jambyl óńiri - Qazaq handyǵynyń alǵashqy týy tigilgen aımaq. Sondyqtan Jambyl jastarynyń rýhy bárinen bıik bolý kerek» dedi Májilis tóraǵasy.
Al M.H.Dýlatı atyndaǵy Taraz Memlekettik ýnıversıtetiniń rektory Mahmetǵalı Sarybekov búginde jastarǵa memleket tarapynan barlyq múmkindikter jasalyp otyrǵanyn, endigi jerde jastar tek bilim men ǵylymdy ıgerý kerektigin aıtty.
О́z sózinde spıker elimiz egemendik alǵannan beri el erteńi jastarǵa kóńil bólinip kele jatqanyn, Elbasy «Bolashaq» baǵdarlamasy arqyly qazaq jastary úshin álemdik órkenıetke jol ashqanyn, nátıjesinde búginde on eki myń jastyń elimizge qyzmet etip otyrǵanyn jetkizdi. Sonymen qatar, Elbasy jastar úshin baspana, jumyspen qamtý máselelerin de qarastyryp otyrǵanyn aıtty.
Kezdesý barysynda Dıana Ábdiǵappar, Qambar Maqsat, Arýjan Sekerbek syndy belsendi jastar jáne ózge de stýdentter kókeıdegi saýaldaryn joldap, tıisti jaýaptaryn aldy. Nurlan Nyǵmatýlın jastarǵa bergen jaýabynda jastardyń bilim alýda da, qoǵamdyq jumystardy atqarýda da belsendi bolýy kerektigin, aýyldy jerlerge jas mamandardy tartý úshin baspana, jumys jáne jalaqy máselesin jergilikti ákimderdiń sheshýi tıis ekenin, bul máselege bıýdjetten qarajat bólingenin aıtyp ótti.
Jambyl óńirine jumys sapary barysynda Májilis tóraǵasy Nurlan Nyǵmatýlın «Nur Otan» partııasy Jambyl oblystyq fılıalyna kelip, azamattardy qabyldaý saǵatyn ótkizdi. Spıker azamattardyń saýalyn tyńdap, olarǵa naqty jaýap berdi.
Hamıt ESAMAN,
«Egemen Qazaqstan»
Jambyl oblysy
