«Qaraǵandy qalasynan 35 shaqyrym jerde ornalasqan, Shahtınsk qalalyq ákimshiligine qarasty, 118 kópqabatty turǵyn úıi bar qala tıptes Shahan kentinde qazirgi tańda 9 myńnan asa halyq turady. Halyqtyń 80%-dan astamyn shahterlar otbasy quraıdy. Toqyraý jyldary – 1995 jyly jylý beretin ortalyqtandyrylǵan jalǵyz qazandyqtan aıyrylyp qalǵan Shahan kenti, qazirgi tańda, turǵyndardyń esebinen salynǵan shaǵyn qazandyqtardyń kómegimen nemese «býrjýıka» dep atalatyn peshterdi paıdalanyp, kópqabatty úılerdi jylytyp, amaldap otyr. Osyǵan baılanysty 2005 jyldan bastap Shahan eldi mekeniniń turǵyndary ortalyqtandyrylǵan qazandyq salýdy talap etip, 2013 jyly jobalyq-smetalyq qujattama ázirlengenimen, qarjylandyrý máselesi sheshilmegen bolatyn», dedi depýtat.
Onyń aıtýynsha, 2017 jyldyń 1 qańtarynda eldiń esin alǵan kenttegi kópqabatty úılerdiń birindegi jertólede ornalasqan avtonomdy jylý qazandyǵy jarylyp, úıdiń bir bóligi opyrylyp qulap, 9 adam qaza taýyp, 2 turǵyn jaraqat alǵan. Endi, budan ári mundaı qaıǵyly oqıǵany boldyrmaı, kent turǵyndaryn kepildi jáne arzan jylýmen qamtamasyz etý úshin ortalyqtandyrylǵan qazandyq salý qajettigi týyndap otyr.
«Osy mańyzdy máseleni sheshý maqsatynda qazirgi ýaqytta Shahan kentindegi ortalyq qazandyq pen jylý júıesiniń qurylysyna jobalyq-smetalyq qujattama qaıtadan ázirlenip, memlekettik saraptamadan ótti. Qurylys-montajdaý jumystarynyń somasy 2 mlrd. 232,0 mln. teńgeni qurap otyr. Osyǵan oraı, jobany iske asyrý Shahan kentiniń turǵyndaryn ortalyq jylý júıesimen qamtamasyz etýge jáne qaýipsiz ómir súrýine múmkindik beredi. Sondaı-aq, qazandyq qurylysy kenttegi turǵyn úı qoryn saqtap, onyń damýyna yqpal etip, adamdardyń ómir súrý deńgeıin jáne sanıtarlyq-ekologııalyq jaǵdaıyn jaqsartady. Osy aıtylǵan máseleniń erekshe mańyzdylyǵyn eskere otyryp, Shahan kentine salynatyn ortalyq qazandyq qurylysyna qajetti qarjy bólýge yqpal etýińizdi suraımyz», dedi ol.
