Jalpy, Qyzyljar aýyldyq aýmaǵyna qazir Qyzyljar, Boryqtal, Jańasharýa, Sýatkól, Saryshyǵanaq sııaqty 5 shaǵyn aýyl qaraıdy. Barlyǵyn qosqanda 3481 adam turady. Úlken aýyl sanalatyn Qyzyljar men Saryshyǵanaqta orta mektep bolsa, al Boryqtal, Sýatkól, Jańasharýa aýyldarynda bastaýysh mektepter ǵana qalǵan. Qyzyljar orta mektebinde 320 oqýshy bolsa, qalǵan 75 oqýshy Boryqtal, Sýatkól, Saryshyǵanaq mektepterinde bilim alýda.
Aýyl ákimi Jeńis Ábikenniń aıtýynsha, bıyl Jańasharýa bólimshesiniń oqýshylary Saryshyǵanaq mektebinde tasymalmen kelip oqıdy. Bala sany azaıǵan shaǵyn mektep jabylypty. Qala ákimi bos qalǵan mektepti ońtústikten kóship keletin otbasylarǵa berýdi tapsyrǵan eken. Biraq oqýshysy kóp Qyzyljar orta mektebi 1972 jyly salynǵan eski mektep. Ishi-syrty, aýlasy jóndeýdi kútip tur. Tóbeden sý aǵady. Kúrdeli jóndeý júrgizilmegeni, eskini jańadaı ǵyp kútetin uqypty qoldardyń joqtyǵy baıqalady. Kirgen betten-aq kóńilsizdik basady. Mekteptiń ekinshi bóliginde aýyldyń ákimdigi ornalasqan...
– Bıyl qaıta plastık terezeler ornatyldy. Byltyr jylý qazandyǵy jóndeldi. Endi birte-birte jóndeler, – dedi mektep dırektory Aıkúmis Jálelqyzy.
Aıtpaqshy, 2013 jyly sáýir aıynda jolsapar barysynda Aqsý qalasynyń aýyldaryn aralaǵanbyz. Mámáıit Omarov aýylyndaǵy mekteptiń bir bóligi jabylyp, qańyrap bos turǵanyn kórgen edik.
– Oqýshylaryńyz úńireıgen eski mektep úıinen qoryqpaı ma? – degen biz sonda mektep dırektory Bıjamal Shákirovaǵa. Osydan keıin gazetimizde sol kezdegi qala ákimi Bolat Baqaýov nazar aýdarar dep «Qala irgesindegi aýylǵa kim janashyr?» degen maqala jazdyq. Bul jolǵy jolsapar barysynda ózimiz jazǵan sol M.Omarov atyndaǵy aýyl mektebine de baryp qaıttyq.
О́ıtkeni 2017 jyly qańyrap bos turǵan mektepke kúrdeli jóndeý jasalǵanyn estip qýanǵan edik. Jaqsylyqty kózimizben kórgimiz keldi.
– Oqýshylardyń bilim alýyna múmkindik jasaldy. «О́ńirlerdi damytý-2020» baǵdarlamasy aıasynda oblystyq bıýdjetten 198 mıllıon teńge bólindi. Qazir jańa mektepte S.Dónentaev, Syrlyqala, Kókterek aýyldarynan kelip oqıtyn 33 balany qosqanda barlyǵy 206 oqýshy bilim alýda. Elge oralǵan aǵaıyndardyń ul-qyzdarymen mektepter tolýda, – degen qýanyshyn jetkizdi Bıjamal Shákirova.
Bizdiń maqalamyz qazirgi oblys ákimi Bolat Baqaýovtyń esinde qalsa kerek, qala irgesindegi aýyl mektebine osylaı janashyrlyq kórsetti. Biraq mekteptiń burynǵy ekinshi bóligi de kúrdeli jóndeýdi kútip turǵanyn eskereıik.
Al Qyzyljar mektebinde oqıtyn balalardyń deni Mońǵolııadan elge oralyp, ornyqqan otbasylardyń ul-qyzdary. Bul otbasylardyń qataryna qala ákimi aıtqan ońtústik oblystardan qonys aýdaryp keletin otbasylardyń balalary qosylsa, bos mektepter tolady degen sóz. Onsyz da jýyrda óńirdegi turǵyndary kóship ketken mektepte oqıtyn balasy az 9 aýyldyq aýmaq qysqaryp qaldy. Qonys aýdarýshylar kelip, orta toltyrý úshin turǵyn úı, jyly da jaıly mektepter kerek. Aýyldy saqtaý – mindet. Aqsý – alyp óndirister ornalasqan qala. Aýyldyń ózinde «Qyzyljar qus» fabrıkasy jumys isteıdi. Bul rette qalanyń, bıznestiń aýyldarǵa qamqorlyǵy jetpeı turǵandaı.
Jalǵyz Qyzyljar mektebi ǵana emes, qalaǵa qarasty basqa da aýyldardaǵy eski mektepter kúrdeli jóndeýdi qajet etedi.
Farıda BYQAI,
«Egemen Qazaqstan»
Pavlodar oblysy, Aqsý qalasy
Sýrette: jóndeýden ótken M.Omarov aýylyndaǵy mektep. Túgel elge oralǵan aǵaıyndardyń ul-qyzy. Burynǵy turǵyndardyń túgeli derlik qalaǵa kóship ketken.
