Megapolıstegi «Almatykitap» oqyrmandar klýbynda ótken jańa kitaptyń tusaýkeserine qatysýǵa múddelilik tanytqan jandar kóptep tabyldy.
Jańa kitap 20 jyl boıy Parıjdiń sán áleminde saltanat qurǵan Alla Ilchýnnyń ómirin ǵana emes, buryn-sońdy belgisiz bolyp kelgen derekter men muraǵattyq qujattardy da qamtıdy.
Derekti kitaptyń jaryqqa shyǵýyna Dosym Satpaevtiń jeke mádenı-aǵartýshylyq qory yqpal etken.
Kitap avtoryna kelsek, Berlın Irıshev – ekonomıst, dıplomat. 1996 jyldan beri Fransııa memleketinde turady. Al burynǵy dıplomatqa óz qandasy jaıly kitap jazý ıdeıasy kútpegen jaǵdaıda paıda bolady. 2018 jyldyń jazynda kórmeden Alla Ilchýnnyń sýretshi Leon Zeıtlen salǵan portretin kórip, satyp alyp qazaqstandyqtarǵa maqtanyshpen kórsetpek bolady. Artynsha 60-qa kelgende ákesiniń qazaq ekendigin moıyndap ketken model týraly kitap jazýǵa sheshim qabyldaıdy.
Avtor kitapty jazý jáne derekter jınaqtaý barysynda mıstıkalyq oqıǵalar men sáıkestikterdiń óte kóp bolǵanyn aıtady. Bul da bolsa sán áleminde «shyǵys marjany» atanyp, erekshe jaratylysymen Eýropany ózine jalt qaratqan túbi qazaq qyzynyń avtorǵa ári qandasyna degen tylsym qoldaýy bolsa kerek.
Avtor osy kitaptyń qalaı jaryqqa shyqqanyn, ony jazý barysynda el jadynan umyt bolýǵa aınalǵan sán týraly ańyz týraly málimetterdi, sán áleminiń padıshasyna aınalǵan qazaq qyzy týraly aqıqatty tiriltýge kimderdiń qolushyn bergeni týraly qyzyqty baıandady.
Qazirge orys tilinde jaryq kórgen kitapta Alla Ilchýn, ıaǵnı Alla Qýanthanqyzy Elshin Qytaı elinde týyp, Ekinshi dúnıejúzilik soǵys kezinde Fransııada partızan bolǵanyn, odan keıin Krıstıan Dıordyń №1 modeli bolǵany tarıhı dáleldermen sýretteledi.
Aınash ESALI,
«Egemen Qazaqstan»
ALMATY
