Onda ǵalymdar men pedagogtar «Rýhanı jańǵyrý» basym oılary kontekstinde zamanaýı bilim berýdiń ózekti baǵyttary», «Zamanaýı mektep pen JOO jaǵdaıynda ınklıýzıvti bilim berý bolashaǵy», «Zamanaýı bilim berý mashyqtanýynda ınnovasııalyq tehnologııalar men ádisterdi qoldaný tájirıbesi», «Bilim berýdi sandyq júıege kóshirý jaǵdaıynda tárbıe áleýetin arttyrý boıynsha jumysty uıymdastyrý» degen búgingi kúni ózekti tórt máseleni qarady.
Konferensııaǵa pedagog-ǵalymdar men oblys óńirindegi mektep muǵalimderi, joǵary, orta oqý oryndarynyń oqytýshylary qatysty. Sonymen qatar konferensııaǵa Máskeý memlekettik halyqaralyq qatynastar ınstıtýtynyń professory, pedagogıka ǵylymdarynyń doktory Elena Berejnova keldi.
Konferensııanyń plenarlyq májilisinde bilim ordasynyń rektory, professor Erkin Ábil ýnıversıtettiń búgingi mıssııasy qandaı bolýy kerek degen máselege toqtady.
Ýnıversıtet mıssııasy qazir bilim berý, ǵylym jáne óńirdi damytý problemalarynan turýy kerek. Qazir jalpy joǵary oqý oryndarynyń qoǵamnyń, ekonomıkanyń damýyna qandaı áseri bolyp otyr? Ony ylǵı da zerttep, zerdelep otyrý kerek. Mysaly, pedagogıkalyq joǵarý oqý oryndary nege tek ǵana pedagogter daıyndaýy kerek? Ýnıversıtet jalǵasyn tabatyn bilim berý ordasy ǵana bolmaı, qoǵamdaǵy áleýmettik isterdiń ortalyǵyna aınalýy tıis. Mysaly, volonterlik isterdiń joǵary oqý oryndarynan óris alyp jatqany belgili , – dedi Erkin Amanjoluly.
Al jýrnalısterge bergen suhbatynda máskeýlik ǵalym-pedagog Elena Berejnova bilim berý salasyndaǵy sıfrlandyrý úderisine baıyppen qaraý kerektigin aıtty.
«Aqparattandyrý, sıfrlandyrý ómirdiń barlyq salasyn dendep qamtyp otyr. Budan eshqaıda qasha almaımyz. Mysaly, sıfrlandyrý ekonomıkanyń barlyq salasyn qamtydy, tipti elektrondyq saýda júzege asýda, al bilim salasynda elektrondyq oqytý júıesi degen túsinik paıda boldy. Múmkin pedagogıka ǵylymy ómirdiń osy aǵysynan shamaly keshikken bolar. Barlyq jańalyqtyń ǵylymı negizi bolýy tıis. Al qazir dál osy ǵylymı dáleldeme, negizdeý jetise bermeıdi. Jańanyń barlyǵyn keremet, jaqsy dep oılamaý kerek. Keıde jańalyq eski qalyptasqan, durys júıeni buzýy múmkin. Keıde bilim berý konvervatorolyq júıe bolyp kórinedi. Biraq ol jaman da emes, tek shamadan tys bolmaýy tıis. Konservatorlyq ǵasyrlar, jyldar boıy ár elderdegi, pedagogtardyń ár tolqyny qalyptastyrǵan, jasaǵan tájirıbeni saqtaýǵa múmkindik beredi. Ekinshi jaǵynan jańa tehnologııalar ǵasyry keldi. Áńgime, ony burynǵyny buzbaı, qolda bardy joǵaltpaı qalaı paıdalana, qabyldaı bilýde» dedi Elena Vıktorovna.
Konferensııaǵa qatysýshylar pedagogıka jáne bilim berý salasyndaǵy búgingi ózekti máselelerdi tórt seksııaǵa bólinip talqylady.
Názıra Járimbet,
Egemen Qazaqstan
Qostanaı
