Senbi kúni «Medeýde» Halyqaralyq motosıklshiler federasııasynyń (FIM) qoldaýymen spıdveı boıynsha jeke álem chemponatynyń aqtyq kezeńiniń alǵashqy kúni ótken bolatyn. Oǵan álemniń bes memleketinen - Qazaqstan, Avstrııa, Shvesııa, Reseı men Germanııadan 18 «muz gladıatory» qatysqan edi.
«Jarystyń alǵashqy kúni 20 irikteý kezeńi, eki jartylaı fınal jáne bir fınaldyq kezeń ótkizildi. Árbir jarysta tórt shabandoz jarysqa shyǵyp, alǵan oryndaryna baılanysty upaı jınap otyrdy. Eń kóp upaıǵa ıe bolǵan shabandozdar jartylaı fınal men fınaldyq kezeńniń tobyn qurady», - delingen Qazaqstan avtomotosport federasııasynyń baspasóz habarlamasynda.
Aıta keteıik, jarysty arena trıbýnasynan Qazaqstan men Reseıdiń Premer-Mınıstrleri Baqytjan Saǵyntaev pen Dmıtrıı Medvedev tamashalady. Olar «muz gladıatorlarynyń» saıysyn belsendi sýretke túsirip otyrdy.
Jarystyń alǵashqy kúninen bastap, álemdegi eń myqty motosıkl shabandozdary ekstremaldy sport túrleriniń jankúıerlerine umytylmas shoý men tistesken kúresti kórsetti. Qatysýshylar muz jolynyń ústimen saǵatyna 100 shaqyrym jyldamdyqpen júıitkidi. Starttyq kezeńder óte qarqyndy ári keremet ótti. Kútkendegideı, reseılik motosıklshiler irikteý kezeńinde birden alǵa shyqty.
Qazaqtar, nemister men avstrııalyqtarǵa álemdik spıdveıdiń sheberlerimen básekege túsý ońaıǵa túsken joq.
Shvesııanyń raıderi Martın Haarahıltýnen alǵashqy sensasııanyń ıesi dese de bolady. Ol básekelesterimen sońyna deıin kúresip, jeńiske jetýge baryn saldy. Nátıjesinde, órshil Shvesııa ókili irikteý kezeńinde jetkilikti upaı jınap, fınalǵa shyqty. Orys shabandozdary úshin negizgi básekelesterdiń biri sanalatyn avstrııalyq Frans Sorn bul joly ónerin kórsete almady. Birinshi jarystaǵy soqtyǵystan keıin ol joǵary jyldamdyqpen qozǵala almaı, jartylaı fınalǵa barar jolda súrindi.
Qazaqstandyq raıderler Vladımır Cheblokov, Sergeı Serov jáne Andreı Shıshegov alǵashqy kúnniń jarystary negizinde jaqsy nátıje kórsete almaı, jarys jolynan shyǵyp qaldy.
20 aınalymnan keıin jeńiske reseılik Danııl Ivanov jetip, 19 upaımen báriniń aldyna shyqty. Ekinshi jáne úshinshi oryndarǵa da reseılik Dınar Valeev pen Dmıtrıı Homısevıch jaıǵasty. Olardyń ekeýi de 17 upaıdan jınady.
Nátıjesinde, osy úsh reseılik shabandoz ben shved Haarahıltýnen fınalda óner kórsetti. Sheshýshi jarysta shved jigiti eń sońǵy bolyp kelip, birinshi orynǵa jas shabandoz Dınar Valeev jaıǵasty. Tájirıbeli Ivanov pen Homısevıchti artqa tastaǵan Bashqurtstan ókili Dınar Valeev osylaısha jarys jeńimpazy atandy.
«Men úshin jarys jaqsy bastaldy dep aıta almaımyn - motosıkl talap etiletin qýatqa jete almady. Degenmen, komandamen birge bul máselelerdi sheshtik. Tamasha nátıje kórsetkenime óte qýanyshtymyn. Meniń jaýyngerlik rýhym bar, men osy jáne kelesi kezeńderde jeńiske jetýge daıynmyn», - dedi Dınar Valeev.
FIM Ice Speedway Gladiators World Championship 2019 álemdik kúntizbege enetin saıys. Almatylyq kezeńdi QR avtomotosport federasııasy uıymdastyrdy.
Eske salaıyq, bıyl muz aıdynyndaǵy motosıklder jarysynyń álem chempıonaty jeti kezeńnen turady - eki irikteý jáne bes fınaldyq kezeń. Jeke birinshiliktiń alǵashqy kezeńin ótkizý Qazaqstanǵa buıyrdy, ekinshi kezeń Reseıdiń Shadrınsk qalasynda josparlanǵan. Osydan keıin shabandozdar Germanııa men Gollandııada jarys jolyna shyǵatyn bolady. Álem chempıonatynyń komandalyq chempıonaty Reseıdiń Tolıattı qalasynda 20 jyldyq úzilisten keıin jalǵasyn tapqaly otyr.
