Náresteler merziminen buryn alty aılyq kezinde týylǵan. Salmaqtary 1500 jáne 1600 gramm. Jańa ómir esigin ashqan sábılerdiń alǵashqyda jaǵdaılary aýyr bolǵandyqtan, jan saqtaý bólimine jatqyzylǵan. Bul týraly qalalyq perınataldyq ortalyqtyń neonatolog dárigeri Maqsat Akpar aıtyp berdi.
Maqsat Akpar, Shymkent qalalyq perınataldyq ortalyqtyń neonatolog dárigeri.
- Shalabaılardyń ómirin aman alyp qalý úshin qalalyq perınataldy ortalyqtyń medısına mamandary baryn salyp, aman alyp qaldy. Anasy men sábıleri qazir ózderin jaqsy sezinedi. Bir aı ishinde úshemderdiń salmaǵy 2500 gramǵa jetken.
Esterińizge salar bolsaq, byltyr qarasha aıynda qalamyzdaǵy perzenthanalardyń birinde 35 jastaǵy ana Dınara Nálibaeva Osman, Omar esimdi eki ul men Zeınep atty bir qyzdy dúnıege ákelgen edi. Úshem qarashanyń 24-ne 33 aptalyq kezinde ota tásilimen týylǵan. Dınara Nálibaevanyń buǵan deıin taǵy eki qyz bir uly bolǵan. Osylaısha jas ana alty balanyń anasy atanǵan edi.
2018 jyldyń basynan beri Shymqalada tórtinshi márte úshem jaryq dúnıe esigin ashty.
Bir qyzyǵy, Shymshaharda dúnıege kelgen nárestelerdiń deni – ul balalar. Qalalyq densaýlyq saqtaý basqarmasynyń baspasóz qyzmeti taratqan habarlamaǵa súıensek, 2019 jańa jylǵa qaraǵan túni shahardaǵy perzenthanada 27 ul bala dúnıege kelipti.
Nurshat TО́KEN,
«Egemen Qazaqstan»
Shymkent
