О́tken jyldyń sońynda Elbasy «Uly dalanyń jeti qyry» atty maqalasyn jarııalap, «Rýhanı jańǵyrý» baǵdarlamasyna tyń serpin bergeni belgili. Soǵan baılanysty elimiz boıynsha aýqymdy jumystar qolǵa alynyp, naqty jobalar júzege asyryla bastady. «Uly dala» shyǵarmashylyq baıqaýy da sondaı ıgi isterdiń biri.
Barsha jeńimpazdar men júldegerlerdi quttyqtaǵan Máýlen Áshimbaev aldymen Elbasynyń «Rýhanı jańǵyrý» baǵdarlamasynyń mańyzyna toqtalyp ótti.
– Elbasy «Bolashaqqa baǵdar: rýhanı jańǵyrý» jáne «Uly dalanyń jeti qyry» atty baǵdarlamalyq maqalalary arqyly elimizdiń ıdeologııa salasyndaǵy jańa kezeńdi bastap berdi. О́ıtkeni bul maqalalarda ulttyq kodty saqtap, tarıhı sanamyzdy qalyptastyrýǵa, sol arqyly rýhanı ómirimiz ben ulttyq sanamyzdy jańǵyrtýǵa baǵyttalǵan naqty máseleler kóterilgen. Búgingideı aýmaly-tókpeli zamanda ult bolyp saqtalyp, táýelsizdigimizdi máńgilik etýdiń qanshalyqty mańyzdy ekeni belgili. Sol jolda osy maqalalarda aıtylǵan basymdyqtardyń bereri mol. Sondyqtan Elbasy kótergen qundylyqtar men ıdeıalardy dáripteý, elimizdiń rýhanı jańǵyrýyna úles qosý – bizdiń basty mindetimiz, – dedi «Nur Otan» partııasy Tóraǵasynyń birinshi orynbasary.
Partııa bul jobany Qazaqstan Jazýshylar odaǵymen birlesip uıymdastyryp otyr. Bul baıqaý «Jastar jyly» aıasynda jas qalamgerlerimizdiń shyǵarmashylyqpen aınalysýyna kórsetilgen úlken qoldaý ekeni de sózsiz.
Jalpy, baıqaýǵa 18 ben 40 jas aralyǵyndaǵy qalamgerler qatysty. Shyǵarmalardy qabyldaý merziminiń qysqalyǵyna qaramastan, 400-den astam eńbek kelip túsken. Nátıjesinde, bes birdeı atalym boıynsha jeńimpazdar men júldegerler anyqtaldy.
Atap aıtqanda, «Proza» atalymynda «Qudyq basyndaǵy ekeý» shyǵarmasymen qatysqan Maqsat Málikov úzdik dep tanyldy. Ekinshi oryn «Medal» atty týyndynyń avtory Qanat Tileýhanǵa buıyrdy. Al úzdik úshtikti «Kazahstanes» shyǵarmasymen Tatıana Kretova túıindedi.
Sol sııaqty «Poezııa» atalymynda Janat Jańqashuly – 1-oryn, Nurgúl Maýlına – 2-oryn, Batyrhan Sársenhan 3-oryn aldy. Úsh aqyn da baıqaýǵa óleńder toptamasyn usynǵan.
«Dramatýrgııa, kórkem fılmder men teleserıaldar ssenarııi» atalymynda taıaýda ǵana «Qazaqstan» ulttyq telearnasynan kórsetilip, kóptiń kózaıymyna aınalǵan «Keıki mergen» teleserıalynyń ssenarııin jazǵan Serjan Zákeruly top jardy. Ekinshi, úshinshi oryndardy tıisinshe «Aısulý» fılminiń ssenarııimen Aıdos Dildebaı jáne «Ábdiǵapar» dramalyq týyndysynyń avtory Abylaı Maýdanov ıemdendi.
«Balalarǵa arnalǵan shyǵarmalar» atalymynda «Uly dalanyń jeti qyry» óleńder toptamasynyń avtory Baýyrjan Qaraǵyzuly bas júldeni aldy. «Ulttyq mýzeıge ekskýrsııa» shyǵarmasynyń avtory Asylan Tilegen ekinshi orynǵa taban tirese, baıqaýǵa «Jylqy degen janýar» óleńder toptamasymen qatysqan Serikbol Hasan úshinshi orynnan kórindi.
«Pýblısıstıka» atalymynda 1-oryn – Maqpal Jumashevaǵa (shyǵarmasy – «Kók bóri totemi»), 2-oryn – Qanat Ábilqaıyrǵa (shyǵarmasy – «Muzdaýan Muzdybaı»), al 3-oryn Gúlbaný Tebegenovaǵa (shyǵarmasy – «Rýhanı jańǵyrý – úshtildilik») buıyrdy.
Barlyq jeńimpazdar men júldegerlerge qomaqty qarjylaı syıaqylar taǵaıyndaldy. Soǵan oraı 1-oryn ıegerlerine – 1,5 mln, 2-oryn ıegerlerine 750 myń, al 3-oryn alǵan qalamgerlerge 500 myń teńgeden berildi.
Baıqaýdyń qazylar alqasynyń quramynda Tólen Ábdik, Aldan Smaıyl, Nesipbek Aıtuly, Ulyqbek Esdáýlet, Nurtóre Júsip, Júsipbek Qorǵasbek, Kópen Ámirbek jáne Álııa Bópejanova sııaqty belgili qalamgerler boldy.
Baǵashar TURSYNBAIULY,
«Egemen Qazaqstan»
