- Bul laýazymǵa Qamıdola Serik Qamıdollauly taǵaıyndaldy. Ol buǵan deıin Jylyoı aýdany Jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń basshysy laýazymyn atqardy, - dedi Nurlan Noǵaev. – Ol tájirıbeli jetekshi, aldyna qoıylǵan mindetterdi sapaly oryndaýǵa qajet qasıetterdiń bári boıynda bar. Osy jumysty aýdanda istedińiz, endi odan da aýqymdy mindet júktelip otyr. Ortalyq organdarmen, aýdandarmen ózara qarym-qatynasta bolý kerek.
Serik Qamıdolla S.Báıishev atyndaǵy ýnıversıtetti, Qazaqstan ınnovasııalyq jáne telekommýnıkasııalar júıeleri ýnıversıtetin bitirgen. Quqyq bakalavry, halyqaralyq ekonomıkada shetel tilderin meńgergen joǵary bilikti ekonomıst.
Eńbek jolyn 1995 jyly Qulsarydaǵy orta mektep dırektorynyń orynbasary qyzmetinen bastap, 1999 jylǵa deıin sol jerde jumys istedi. 2000-2004 jyldary jeke fırmada ekonomıst boldy.
2004 jyldan bastap Jylyoı aýdany Jumyspen qamtý jáne áleýmettik baǵdarlamalar bóliminde áleýmettik tólemder bólimi meńgerýshisiniń mindetin atqarýshy boldy.
2008 jyly Jylyoı aýdandyq Jumyspen qamtý jáne áleýmettik baǵdarlamalar bóliminde sektor meńgerýshisi qyzmetin atqardy.
2010 jyly aýdandyq Jumyspen qamtý jáne áleýmettik baǵdarlamalar bólimin basqardy.
2011 jyly Atyraý oblystyq Jumyspen qamtýdy úılestirý jáne áleýmettik baǵdarlamalar basqarmasy ardagerlermen jáne múgedektermen jumys bóliminiń basshysy bolyp taǵaıyndaldy.
2012 jyldan kúni búginge deıin Jylyoı aýdandyq Jumyspen qamtýdy úılestirý jáne áleýmettik baǵdarlamalar, azamattyq hal aktilerin tirkeý bóliminiń basshysy boldy.
Aktıvte oblys ákimi Atyraý oblystyq Jumyldyrý daıarlyǵy jáne azamattyq qorǵanys basqarmasynyń basshysy bolǵan Ǵıbrat Súleımenovke atqarǵan jumysy úshin rızashylyǵyn bildirdi.
- Zeınetkerlik jasyna jetýine baılanysty Súleımen Ǵıbrat Erkinuly laýazymynan bosatyldy. Jasaǵan jumystary úshin alǵys aıtqym keledi. Ol uzaq jyldar boıy ákimdikte túrli basqarmalardy basqardy, aımaqtyń damýyna úlken úles qosty, - dedi Nurlan Noǵaev.
Sonymen qatar, Maqsot Muqanov Aýyl sharýashylyǵy basqarmasynyń basshysy laýazymynan bosatyldy. Ol endi Qyzylqoǵa aýdandyq aýmaqtyq saılaý komıssııasyn basqaratyn bolady.
Baqytgúl BABASh,
«Egemen Qazaqstan»
Atyraý
