«Damý» kásipkerlerdi qoldaý» qory arqyly jeńildikti nesıege turǵyzylǵan «Help clinic» medısınalyq ortalyǵyna kelýshiler kóp. Buǵan deıin naýqastar jalǵa alynǵan eski ǵımaratta em-dom alyp kelse, endi kásibı mamandar kúlimsireı qarsy alady.
Januzaq Bazarbekov densaýlyq salasynda shırek ǵasyrǵa jýyq eńbek etedi. Joǵary sanattaǵy nevropatolog osydan eki jyl buryn ózi sııaqty bilikti dárigerlerdiń basyn qosyp, qalada alǵashqy emdeý kabınetin ashqan. Ol úshin bólmelerdi jaldap kelgen. Endi úkimettiń qoldaýy arqasynda keń de jaryq nysandy salý múmkindigine ıe boldy.
«Emdelýshilerge barlyq jaǵdaı jasalǵan. Kúndizgi stasıonar jumys isteıdi. Em qabyldaý kabınetterine zamanaýı jabdyqtar qoıylǵan. Aldaǵy ýaqytta qyzmet túrlerin kóbeıtemiz», deıdi bas dáriger J. Bazarbekov.
Emdeý ortalyǵy ostehondroz, omyrtqanyń jaryǵy, nevrologııalyq aýrýlardy da emdeıdi. Insýlttan keıin em alýlaryna bolady. Aqyly massaj ben manýaldy terapııamen qatar munda tegin medısınalyq kómektiń kepildendirilgen kólemi aıasynda emhanalarda esepte turǵan azamattarǵa tegin qyzmet kórsetiledi.
Búginde medısınalyq ortalyqta myńǵa jýyq naýqas esepte tur.
О́mir ESQALI,
«Egemen Qazaqstan»
Soltústik Qazaqstan oblysy
