Aqmola oblysy aýyl sharýashylyǵy óniminiń kólemi boıynsha respýblıkada aldyńǵy oryndarda. Áıtse de, eginshilik mádenıetin jetildirýde sharýa qojalyqtarynyń olqylyqtarǵa jol berip jatatyny da bar. Oralymsyzdyqtyń basty sebepteriniń biri – tyńaıtqyshtardy orynsyz qoldanýda. Aldaǵy ýaqytta osy bir kemshiliktiń aldyn alý úshin Sáken Seıfýllın atyndaǵy Qazaq agrotehnıkalyq ýnıversıtetiniń ǵalymdary ortalyq Qazaqstan men soltústik óńirlerde kóshpeli semınarlar ótkizýde. Semınarǵa qatysýshylar topyraq qunarlylyǵyn arttyryp, ónim ónimdiligin joǵarylatý boıynsha praktıkalyq dáris aldy.
– Aqmola oblysynyń 150-ge jýyq sharýa qojalyqtarynyń basshylaryn jınap semınar ótkizip jatyrmyz. Sıfrlandyrý boıynsha qandaı jańalyqtar enip jatyr, keler jyly aýyl sharýashylyǵy salasynda qandaı erekshelikter oryn almaq? Osy tóńirekte áńgime órbitip, mamandardy soǵan beıimdeýge atsalysatyn bolamyz,–deıdi S.Seıfýllın atyndaǵy qazaq agrotehnıkalyq ýnıversıtetiniń prorektory Qaırat Aıtýǵanov.
Agroónerkásip kesheniniń tıimdiligin anyqtaý úshin, onyń maqsatyn, qoǵamnyń materıaldyq jaǵdaıynyń ońtaılanýyn jáne áleýmettik faktorlardy qamtamasyz etýdi eskerý kerek. Qazaq agrotehnıkalyq ýnıversıtetiniń ǵalymdary men sarapshylary geoaqparattyq júıesi tehnologııasyn qoldaný jáne aýyl sharýashylyǵynda jerdi qashyqtyqtan burǵylaý týraly tolyq aqparat usynyp, eginshilik júıesi boıynsha topyraq qunarlylyǵyn maqsatty túrde basqarý ádisterin, tyńaıtqyshtardy dıfferensıaldaý, aramshópter men zııankesterdiń fıtosanıtarlyq monıtorıngi jaıynda sóz qozǵady.
– Qazir jańa tehnologııalardy da qoldaný ústindemiz. Qarapaıym tilmen aıtsaq, sıfrlandyrý salaǵa aıtarlyqtaı serpin berýdk. Dronmen topyraq jamylǵysynyń jaı-kúıin tez anyqtaı alamyz. О́simdiktaný, geoaqparattyq júıe, agronom, ekonomıst mamandar bolyp byltyrdan beri óńirlerde jumys isteýde,–deıdi aýyl sharýashylyǵy ǵylymdarynyń kandıdaty Tilekqalı Turǵynbaev.
Biliktilikti arttyrý kýrsyna qatysýshylarǵa atalǵan dáristerden bólek, agroónerkásiptik ónimderdi aqparattandyrý jáne sıfrlandyrý jaǵdaıynda ekonomıkalyq sheshimderdi taldaýmen ońtaılastyrý úrdisteri jaıynda da aqparattar berildi.
Baıqal BAIÁDIL,
«Egemen Qazaqstan»
