Jıynda ótken jyly atqarylǵan jumystar týraly esep bergen atalmysh korporasııa basshysy Núrken Shárbıev bıznes qurylymdary arqyly salynǵan ıvestısııa kórsetkishi 146 mıllıon teńgege jýyqtaǵanyn jetkizdi. Ol 59 ınvestısııalyq jobaǵa taldaý jasap, ol jobalardyń 6-aýy ken óńdeý, 3-eýi malsharýashylyǵy, 12-si óndiris, 11-i qyzmet kórsetý, 5-eýi qurylys salasy, 22-si ósimdik sharýashylyǵy salasyna tıisti ekenin aıtyp ótti.
Korporasııa birqatar kórsetkishterde oıdaǵydaı nátıjege qol jetkizgenimen, sheshimin kútken túıindi máseleler de az emes bolyp shyqty. Aıtalyq, oblys ortalyǵyndaǵy jabaıy saýda oryndaryn joıyp, birtıpti dúńgirshekter salý jumystary qolǵa alynǵanymen, búginde onyń nebary 12-si ǵana boı kótergen eken. Indýstrıaldy aımaq qurýǵa qatysty máseleler de naqty sheshilmegen. Kásipkerlerdi qoldaý sharalaryna bólingen qarjyny baqylaý jumystary da oıdaǵydaı emes. Ákim bul oraıda quzyrly mekemelerge turaqtandyrý qoryna bólinetin qarajatqa baqylaý men esep-qısapty ár jyl saıyn turaqty túrde júrgizip otyrýdy tapsyrdy. Sondaı-aq, oblys ákimi korporasııanyń qatysýymen óńirde júzege asyrylatyn jobalar sanyn arttyrýǵa nazar aýdarý kerektigin eskertti.
Jıynda turǵyndardyń turmystyq jaǵdaıyna qatysty máseleler de sóz bolyp, atalmysh uıymnyń bul oraıda atqaratyn mindettemeleri jan-jaqty saralandy. Sonymen qatar, memlekettik baǵdarlamalar aıasynda agroqurylymdar qurý, jeke kásipkerlerge jan-jaqty qoldaý kórsetý, áleýmettik mańyzy bar azyq-túlik baǵasyn birqalypty ustap turý sekildi baǵyttarda atqarylýy tıis is-sharalar talqylandy.
Asqar Myrzahmetov jýyrda ǵana ótken QR Úkimetiniń keńeıtilgen otyrysynda aıtylǵandaı Elbasy tapsyrmasyna oraı, óńirdiń damý kartasy qaıta qaralatynyn jetkizdi. Sonymen qatar, memleket pen jeke menshik bıznestiń múmkindikterin biriktire otyryp, jeke menshik sektordy qoldaý arqyly óńir ekonomıkasyn damytýǵa kúsh salý qajettigin basa aıtyp, uıym basshylyǵyna naqty tapsyrmalar júktedi.
Hamıt ESAMAN,
«Egemen Qazagstan»
Jambyl oblysy
