Bul Bıler keńesi týraly ereje jobasyn Qazaqstan Sýdıalar odaǵynyń Batys Qazaqstan oblysy boıynsha fılıaly daıyndaǵan eken. «Tatýlasý: sotqa deıin, sotta» jobasyn júzege asyrý maqsatynda qurylǵan Bıler keńesi týraly erejede Bıler keńesiniń negizgi mindetteri, qurý tártibi, Bıler keńesiniń qyzmetin uıymdastyrý jáne qyzmetiniń toqtatylýy týraly máseleler kórsetilgen.
– Bıler keńesi – bul qazaq bıleriniń dástúrin jańǵyrtý, daýlasýshylyq deńgeıin tómendetý, quqyq buzýshylyqqa tózbeýshilik pen onyń aldyn alý máseleleri boıynsha, salt, ǵuryp, ozyq dástúrlerdi saqtaý jóninde aýyldyq, aýdandyq, qalalyq ákim janynan qurylatyn keńesshi organ, – deıdi Batys Qazaqstan oblystyq sotynyń baspasóz qyzmeti mamany Nurgúl Qanatbaeva.
Qazirdiń ózinde Batys Qazaqstan oblysynyń 10 aýdanynda Bıler keńesi qurylyp, 95 aýyldyq okrýgte jumysyn bastaǵan. Bıler keńesi alǵash qaraǵan 20-dan astam daý sol otyrystarda sheshilip, sotqa jetpeı qysqarypty.
Mysaly, Qaztalov aýyldyq okrýgindegi 7 adamnan quralǵan Bıler keńesi ekologııalyq máselege baılanysty daýdy sheshti. Bul daý kólge sý jetkizý úshin tartylǵan arna sharýa qojalyqtarynyń jerinen ótip, aýyl turǵyndary men sharýashylyq basshylary arasynda paıda bolǵan túsinispeýshilikten týyndaǵan. Daý sotqa jetpeı retteldi.
Jalpaqtal men Kókterek aýyldyq okrýgteriniń Bıler keńesi úı janýaryn basqa tulǵanyń zańsyz ıelenýinen aldyrtý, bereshekti óndirý jáne jer ýchaskesin bólýge baılanysty 3 daýdy rettedi. Taraptar Jalpaqtal aýyldyq okrýginiń Bıler keńesine júginýdiń nátıjesinde daýlar sotqa jetpeı sheshimin tapty.
Bókeıorda aýdanynyń 7 aýyldyq okrýginde Bıler keńesi qurylyp, 8 daý qaralǵan. Onyń ekeýi – qaryzdy qaıtarý týraly, beseýi – jaqyn týystar arasyndaǵy otbasylyq daý bolsa, bireýi – kórshilerdiń jer daýy eken.
Jańaqala aýdanynyń Bıler keńesinde de 5 daýly máseleni rettelgen. Daýdyń biri sharýa qojalyǵy men jergilikti turǵynnyń arasynda bolypty. Sharýa qojalyǵynyń ıesi B. degen azamat óz ıeligindegi jaıylym jerden jaýapkerdiń malyn shyǵarýdy talap etipti. Sýdıa taraptarǵa Bıler keńesine júginý arqyly daýdy sheshý múmkindigin túsindirgen soń talapkerden aryzyn qaıtaryp alǵan.
– Aýdandyq sottarda ótken qorytyndy májilisterde Keńes músheleri Bıler keńesiniń tıimdiligin, osy arqyly turǵyndar arasynda adamı qarym-qatynastar saqtalyp, áleýmettik shıelinisterdi boldyrmaýǵa septigin tıgizetinin atap ótti. Erejeniń bekitilýi Bıler keńesiniń jumysyna jańa serpin beredi dep oılaımyz, – deıdi Nurgúl Qanatbaeva.
Qazbek QUTTYMURATULY,
«Egemen Qazaqstan»
Batys Qazaqstan oblysy
