Onyń sózine súıensek, eńbek qatynastaryn retteýdiń barlyq baǵyttary boıynsha qaterlerdi anyqtaý jumysy júrgizilip jatyr.
«О́ńirlerde prokýratýra, memlekettik kirister jáne ádilet organdarynyń qatysýymen arnaıy shtabtar jumys isteıdi. Qabyldanǵan sharalardyń nátıjesinde 2018 jyly 32 myń jumyskerdiń aldynda 3,7 mlrd. teńge somasynda jalaqy bereshegi tólendi», dedi S.Jaqypova.
Vıse-mınıstr keltirgen málimetke súıensek, 2019 jylǵy 23 qańtarǵa deıin 139 kásiporynda 6,3 myń jumyskerdiń aldyndaǵy bereshek 1,8 mlrd. teńgeni quraǵan.
«2018 jyly memlekettik eńbek ınspektorlary 8 774 tekserý júrgizdi, onyń barysynda 11 976 buzýshylyq anyqtaldy. Jumys berýshilerge 5 uıǵarym berildi jáne 402,5 mln. teńge somasyna 2 492 aıyppul salyndy», dedi S.Jaqypova.
Negizgi buzýshylyqtar qatarynda jalaqyny ýaqytynda tólemeý (20%), qaýipsiz eńbek jaǵdaılaryn qamtamasyz etpeý (20%), jumysqa zańsyz tartý jáne jumystan zańsyz bosatý (14%) bar.
Al sheteldiń qatysýy bar kásiporyndardaǵy jaǵdaı baqylaýǵa alynyp, olarǵa qatysty 38,9 mln. teńgege 124 aıyppul salyndy.
«Memlekettik ınspektorlar eńbekti qorǵaý talaptaryn buzý faktileri boıynsha quqyq qorǵaý organdaryna 1 400 materıal jiberi. Bul boıynsha 98 qylmystyq is qozǵaldy», dedi vıse-mınıstr.
Jumyskerlerdiń eńbek jaǵdaıyn profılaktıkalyq baqylaý nátıjesinde 2018 jyly óndiristik jaraqattaný deńgeıi 6,6% tómendegen.
Sonymen qatar vıse-mınıstr qamsyzdandyrý, áleýmettik jáne medısınalyq saqtandyrý júıelerine tartý úshin azamattardyń statýsyn naqtylaý jáne formalızasııalaý jónindegi jol kartalaryn iske asyrý máselelerine toqtaldy.
«2019 jylǵy 21 qańtardaǵy jaǵdaı boıynsha memlekettik derekqorlarda statýsy bolmaǵan 2,7 mln. adamnyń ishinen 1,8 mln. adamnyń statýsy naqtylandy. Formalızasııalaý jumysyn belsendi túrde júrgizý úshin óńirlerge qalǵan nysanaly toptar boıynsha tolyq josparlar jiberildi. Jyl sońyna deıin 915,6 myń azamattyń statýsyn naqtylaý jumysyn aıaqtaý josparlanǵan», dedi S.Jaqypova.
Sondaı-aq 2019 jyldan bastap jańa quqyqtyq rejım – Biryńǵaı jıyntyq tólem engizilgenin jetkizdi. Mundaı qaadm beıresmı jumyspen qamtylǵan azamattarǵa jáne frılanserlerge kásipkerlik qyzmetin jeńildetilgen tártippen tirkeýge jáne áleýmettik kepildikterge qol jetkizýge múmkindik beredi. Derekterge súıensek, 2019 jylǵy 1 aqpandaǵy jaǵdaı boıynsha 4 myńnan astam azamat biryńǵaı jıyntyq tólem júrgizgen.
