Shymkent qalasyndaǵy №8 gımnazııanyń 6-synyp oqýshysy Nurıman Ádilhan osy taqyrypty zerttep kóripti. Sóıtip Bilim jáne ǵylym mınıstirligi men «Daryn» respýblıkalyq ǵylymı praktıkalyq ortalyǵy uıymdastyrǵan XIV «Zerde» ǵylymı jobalar baıqaýyna usynǵan.
«Bul taqyrypty tańdaǵan sebebim, 2 jyl buryn «Qalqanqulaq» atty telehıkaıaǵa túskenmin. Stýdııada kóp ýaqytymdy anımatorlardyń janynda ótkizdim. Qaǵaz betine salynǵan sýretterdiń kógildir ekranda kórsetý joldaryn kórdim. Ol prosess meni óte qatty qyzyqtyrdy. Jobamdy tamyz aıynan bastap daıyndadym. Biz tehnıka damyǵan zamanda ómir súrip jatyrmyz. Balalarǵa arnalǵan anımasııalyq fılmder jeterlik. Olar otandyq jáne sheteldik bolyp ekige bólinedi. Joba barysynda fılmderdiń paıdasy men zııanyn, otandyq jáne sheteldik mýltfılmderdiń aıyrmashylyǵy men erekshelikterin zerttep, shyǵý tarıhy jáne negizin qalaýshylardy toptastyrdym. Ekranǵa deıingi jumystar jáne qazaq tilindegi týyndylardyń durys sóıleýge, tildi úırenýge arnalǵan joldaryn qarastyrdym» deıdi baıqaýda «Mýltfılmderdiń paıdasy men zııany» jobasymen Bas júldege ıe bolǵan Nurıman Nurlanuly.
Qııal-ǵajaıypqa negizdelgen kóp serııaly "Qalqanqulaq" telehıkaıasynda aqyldy Baqbergenniń rólin somdaǵan Nurıman Ádilhan keleshekte qazaq kınosy men mýltıplıkasııa ónerin damytýǵa úles qosqysy keledi. Shymkent qalasynan qatysqan 22 oqýshy Aqmola oblysynyń Shýche qalasynda ótken respýblıkalyq baıqaýdan júldemen oraldy.
Ǵalymjan ELShIBAI,
«Egemen Qazaqstan»
Shymkent
