Kez kelgen adamnyń júregin dir etkizer oqıǵanyń el aman, jurt tynyshta oryn alǵany kópshilikti alańdatpaı qoımady. Sum ajal aıtpaı keledi desek te, beıkúná balalardyń ólimi kúpti oılardy da týǵyzdy. Tek elordada ǵana emes, mundaı kórinis elimizdiń kez kelgen aımaǵynda oryn alyp jatatyny ras. Onyń bári ár adamdy «nelikten» degen jaýaby tabylmas oılarǵa jeteleıdi. Alaıda bes birdeı búldirshinniń kenetten otqa oranýy kezdeısoqtyq emes sekildi. О́rtke qarsy kúres mekemesi tıisti qyzmetiniń óz jumysyna salǵyrt qaraýy ma deımiz. Qaıǵyly oqıǵaǵa kim jaýapty degende, 100 myń adamǵa shaqqanda órtten qaıtys bolǵandar týraly álemdik 2016 jylǵy statıstıkaǵa kóz júgirtsek, bizdiń elimiz 68-orynda ǵana eken. Demek, tótenshe jaǵdaılar jumysynda toqyraý bar. Muny Astana qalasynyń ákimi Baqyt Sultanov ta jasyrmady. Ákim: «Bul sizderdiń tikeleı jumystaryńyz, árqashan men aıtyp otyrýym kerek pe? Baıaǵyda tekseris júrgizý kerek edi, mindetti túrde qaıǵyly oqıǵany kútesizder me?! Bul - Tótenshe jaǵdaılar departamentiniń qateligi. Sizder jeke sektorda turatyn ár adamdy tanýyńyz kerek» dedi.
Osyǵan oraı, Baqyt Sultanov shuǵyl jıyn ótkizip, bes bala qaıtys bolǵan órttiń shyǵý jaıyn jan-jaqty anyqtaýdy talap etti. «Osy jaǵdaıǵa dýshar bolǵan otbasyna qaıǵyra kóńil aıtamyn. Qala basshylyǵy oqıǵa ornynda boldy, qaza tapqan balalardyń ata-anasymen psıhologtar jáne áleýmettik qyzmet mamandary jumys isteýde. Zardap shekken otbasyna qalalyq áleýmettik qorǵaý basqarmasy tarapynan materıaldyq kómek kórsetildi. «Saryarqa» aýdany ákimine jerleý rásimin uıymdastyrýdy jáne otbasyna ýaqytsha baspana berýdi, janǵan úıdi tez arada qalpyna keltirý úshin qarajat bólýdi tapsyramyn» dedi qala ákimi. Al Tótenshe jaǵdaılar departamenti bastyǵynyń mindetin atqarýshy Marǵulan Amanbaev osyǵan deıin Kóktal-1 turǵyn alabynda órt jáne basqa da tótenshe jaǵdaılardyń aldyn alý úshin profılaktıkalyq jumystar júrgizilgenin aıtty. «Sol kezde Tótenshe jaǵdaılar departamentiniń qyzmetkerleri bul úıge barǵan bolatyn, olqylyqtardy joıý úshin eskertpe berilgen» dedi ol. Alaıda keshe túngi saǵat 02:34-te Astana qalalyq TJD «101» pýltine túsken habarda «Shyńǵystaý kóshesi, 5 mekenjaıda ornalasqan sharýashylyq qurylysy órtenip jatqany aıtylǵan kórinedi. Al Astana qalasy ákimdiginiń baspasóz qyzmeti jeke úı aýmaǵyndaǵy shaǵyn úı órtengenin jetkizdi.
Árıne, apattyń, oqys oqıǵalardyń aldyn alatyn profılaktıkalyq jumystar talapqa saı júrgizilip tursa, mundaı qaıǵyly oqıǵalar bolmas pa edi deımiz. Qala ákimi Baqyt Sultanov aýdan ákimderi men tótenshe jaǵdaılar departamenti jáne polısııaǵa birlese otyryp, jeke sektordaǵy ár úıge baryp, órt qaýipsizdigin saqtaý jóninde tekseris, túsindirý jumystaryn júrgizýdi talap etti. Sondaı-aq quzyretti organdardan bolǵan jaıdyń barlyq mán-jaıyn tolyq anyqtaý tapsyryldy. Bul qatań eskertpeni quzyretti organdar basshylary keleshekte jadynan esh shyǵarmasa eken deımiz.
Aleksandr TASBOLAT,
«Egemen Qazaqstan»
