Baspasóz jıynynda Ǵ.Tursynbaev «B» korpýsy laýazymyna úmitker tulǵalar úshin jeke qasıetterin baǵalaýǵa arnalǵan testileýde jaýaptardyń rastyq deńgeıi 50% kem bolmaýy tıis ekenin málimdedi. Eger kórsetkish nátıjesi tómen bolsa úmitker jeke qasıetterin baǵalaýdyń rastyq deńgeıinen ótpedi dep tanylady jáne bir aıdan kem emes merzimnen keıin qaıta ótýge múmkindik alady eken.
«1 aqpannan bastap, departament qyzmetshileri óńirlerdegi testileý ortalyǵynda testileý ákimshisi retindegi qyzmetin toqtatty. Bul qyzmetti «Memlekettik qyzmettiń personalyn basqarý ulttyq ortalyǵy» AQ-nyń testileý operatory atqaratyn bolady jáne osy ýaqyttan bastap «B» korpýsynyń bos laýazymyna úmitkerler konkýrs jarııalaǵan memlekettik organǵa zańnamany bilý týraly sertıfıkat pen jeke qasıetterin baǵalaý qorytyndysyn ótkizbeıdi» dedi ol.
Sondaı-aq, kommýnıkasııalar qyzmetinde belgili bolǵandaı, «B» korpýsy laýazymdarynyń úlgilik biliktilik talaptaryna eń tómengi laýazymdardan bólek, joǵary laýazymdar úshin de eńbek ótili qajet etilmeıdi eken. Atap aıtqanda, memlekettik organdardaǵy bas maman laýazymyna joǵary bilim bolsa jetkilikti, al jetekshi maman laýazymyna joǵary nemese orta bilimnen keıingi bilimi bar tulǵalar úshin ornalasý quqyǵy berilgen.
Osynaý ózgeristerdiń nátıjesinde laýazymdyq sanattar boıynsha qoıylatyn talaptar birshama jeńildetilgenin habarlaǵan jetekshi bul jumystardyń nátıjesinde merıtokratııa qaǵıdattaryn nyǵaıtý múmkindikteri artqanyn aıtty.
