О́ńir basshysy Asqar Myrzahmetovke esep bergen oblys ákimdiginiń ekonomıka jáne bıýdjettik josparlaý basqarmasynyń basshysy Gúldana Jaýynbekova saladaǵy oń kórsetkishterdi baıandap, qajetti sharalardyń der kezinde qabyldanyp, iske asyrylýynyń nátıjesinde ekonomıkanyń negizgi salalarynda ósimge qol jetkizilgenin tilge tıek etti. Onyń aıtýynsha, oblystaǵy qysqa merzimdi ekonomıkalyq ındıkator 104, 6 paıyzdy, ónerkásiptegi naqty kólem ındeksi 102,6 paıyzdy, Aýyl, orman jáne balyq sharýashylyǵy men jalpy aýyl sharýashylyǵy ónimderi 106,1 paıyzǵa jetken.
Jıyn barysynda oblystyń bul oń kórsetkishteri elimizdiń ózge óńirleri arasyndaǵy joǵary nátıjelerdiń qatarynda ekeni aıtyldy. Mysaly, bólshek saýda aınalymynda oblysymyz 279,3 mıllıard teńgemen Respýblıka óńirleriniń arasynda 3-orynǵa turaqtasa, sol sııaqty, paıdalanýǵa berilgen turǵyn úı kólemi jaǵynan da aldyńǵy qatardamyz. Naqtylaı toqtalsaq, ótken jyldyń qorytyndysy boıynsha oblysta barlyǵy 482,3 sharshy metr turǵyn úı berilgen. Sondaı-aq, ındýstrııaldyq ınnovasııalyq damýdyń memlekettik baǵdarlamasy aıasynda 10 mıllıard teńgege 6 joba iske asyrylyp, 481 jańa jumys orny ashylǵan.
El ekonomıkasynyń negizgi lokomotıvteriniń biri – aýyl sharýashylyǵy salasy desek, óńirde agroónerkásip keshenin damytý baǵdarlamasy aıasynda egistik alqaby ulǵaıyp, qoı etiniń eksporty artyp, 55 kooperatıv ashylǵan. Asqar Isabekuly aýyl áleýetiniń ósýi oblys ekonomıkasyna tikeleı áser etetinin eskerip, eldimekenderdi damytý kerektigin basa aıtty. Ol úshin aýyldyq okrýg ákimdikteriniń jumysyn shıratýdy tapsyryp, ár aýyldyń ekonomıkalyq-áleýmettik tólqujatyn jasaý jumystaryn tezirek oryndaýdy júktedi.
