Tekserý negizinen aýyl sharýashylyq mańyzy bar jerler men kommersııalyq nysandar qurylysynyń salynbaýyna qatysty júrgizilgen. Eldi mekenderdegi jer telimderin óz betinshe ıemdenip, onyń aýmaǵyn qorshap alý faktileri joq emes. Mundaı faktiler jıi kezdesedi. Mysaly, Qarasý aýdanyndaǵy sharýa qojalyqtary basshylarynyń 3,1 myń sharshy metr jerdi zańsyz ıemdenýine qatysty 4 málimet anyqtaldy. Olarǵa tıisti jaza qoldanylyp, 600 myń teńge aıyppul salyndy.
О́tken jyly basqarma aýyl sharýashylyq mańyzy bar 504,7 myń gektar aýmaqtyń 76 myń gektardan astamyndaǵy oryn alǵan zań buzýshylyqty anyqtady. Máselen, jaıylym jer bolyp, onda jaıylatyn mal bolmasa, bul zańǵa qaıshy degen sóz. Bul talaptardy saqtamaǵandardyń jerin sot arqyly májbúrli túrde qaıtaryp alý kózdelgen. Byltyr aýyl sharýashylyǵy maqsatyndaǵy 456 myń gektar aýmaqqa qatysty 28 narazy hat joldanǵan bolsa, memleket menshigine 290 myń gektarǵa jýyq jer telimi qaıtaryldy. 130 ga alqapqa qatysty qujattar sot qaraýynda jatyr.
«Bıyl aýyl sharýashylyq baǵytyndaǵy 10,7 myń gektar bolatyn 11 ýchaskeni sot arqyly qaıtaryp alý josparlanyp otyr» dedi basqarma basshysy Nurlan Ábdýov.
Oblys ákimi Arhımed Muhambetov keıbir aýdandardaǵy jer paıdalaný men qorǵalýyn baqylaý bólimderinde mamandar jetispeıtinin, bul máseleni sheshý qajettigin de aıtty. Eń bastysy jer bos jatpaýy tıis.
«Paıdalanylmaǵan jer degen bolmaý kerek. Ony qaıtarý úshin eskertý, qanshama hattar, sotqa berýdiń uzaqqa sozylatyn prosess ekenin túsinemiz. Aýyl adamdarynan maldyń órisi joq dep shaǵym kóp túsedi. Mal ustaý úshin memlekettik baǵdarlamalarǵa qatysyp, shaǵyn nesıe alatyndar, malyn qaıda jaıaryn bilmeıdi. Al keıbireýler jerdi alyp alyp, ne ózi paıdalanbaıdy, ne jurtqa bermeıdi. Mundaı bos jerlerdi memleketke qaıtarý kerek» dedi Arhımed Begejanuly.
Názıra JÁRIMBET,
Egemen Qazaqstan
Qostanaı
