Qazaqstannyń Germanııadaǵy Elshisi Bolat Núsipov, BVDSI Prezıdenti Gans van Heldorf, QR-dyń Gambýrgtegi Qurmetti konsýly Iohann Kıllınger, sondaı-aq Germanııanyń orta jáne shaǵyn bıznes ókilderi qatysqan is-sharada podıýmdyq talqylaý men Qazaqstannyń Eýrazııa qurlyǵyndaǵy ıntegrasııalyq prosester aıasyndaǵy ekonomıkalyq jáne logıstıkalyq hab retindegi mańyzdylyǵy týraly qyzý pikir almasý oryn aldy.
Odan basqa, forým barysynda «Azııanyń qazirgi zamanǵy saıası-ekonomıkalyq róli», «Qazaqstan Reseı, Eýroodaq jáne Azııa arasyndaǵy ekonomıkalyq kópir retinde», sondaı-aq «qazaqstandyq jáne qytaılyq qurylys megajobalary» taqyrybynda Sıýrıh qoldanbaly ǵylym ýnıversıtetiniń professory Karl Pılnyı, SOLVECON INVEST konsaltıngtik kompanııasynyń bas sarapshysy Folker Helmaıer jáne ataqty nemis sáýletshisi Volkvın Marg baıandama jasady. «KTJ Ekspress» ulttyq kompanııasynyń ókili Alen Djangozın jınalǵandardy mysal retinde «Beldeý jáne jol» bastamasy aıasynda júzege asyrylyp jatqan áınek zaýytynyń qurylysy jobasymen tanystyrdy.
Qazaqstan men Jibek joly boıynda ornalasqan barlyq memleketter arasyndaǵy ekonomıkalyq, ınvestısııalyq, kólik-tranzıttik jáne logıstıkalyq yntymaqtastyqty arttyrý keleshegi, sondaı-aq elimizdiń Eýroodaqpen ózara qarym-qatynasyn odan ary nyǵaıtý talqylaýdyń arqaýy boldy.
Gambýrgtegi forým aıasynda B.Núsipovtiń Eýropadaǵy asa iri mys óndirýshi «Aurubis AG» kompanııasynyń Basqarma tóraǵasy Iýrgen Shahlermen jáne vıse-prezıdenti Krıstof Konıgpen, «BUSS Group» logıstıkalyq kompanııa basshylyǵy, «Deutsche Bahn» iri temirjol operatory, sondaı-aq Germanııanyń shaǵyn jáne orta bıznes ókilderimen ekijaqty kezdesýleri ótti. Kezdesýler qorytyndysy boıynsha taraptardyń naqty jobalarǵa ońtaıly túrde jeteleıtin ınvestısııalyq jáne kóliktik-logıstıkalyq yntymaqtastyqty jandandyrýǵa qatysty ózara umtylysy rastaldy.
