Aýmaqtyq departament basshysy N.Jannazarova Elbasynyń joldaýy aıasyndaǵy sybaılas jemqorlyqqa qarsy is-qımyl boıynsha Agenttiktiń aýmaqtyq departamenti tarapynan atqarylyp jatqan jumystarǵa toqtaldy. Ásirese, Sybaılas jemqorlyqqa qarsy is-qımyl týraly Ulttyq baıandama jobasyna, turǵyndarmen keri baılanys mehanızmderin jetildirý, memlekettik qyzmetshilerdiń ádep erejelerin saqtaýynyń mańyzdylyǵy jáne memlekettik kórsetiletin qyzmetter sapasy men sybaılas jemqorlyq profılaktıkasy baǵytynda atqarylyp jatqan jumystarǵa toqtaldy.
Agenttikpen qyzý qolǵa alynǵan mańyzdy jobalardyń biri, óńirimizde byltyrdan beri júzege asyrylyp kele jatqan «Protecting business and investments» jobasynyń 2018 jyldyń nátıjeleri, sheteldik jáne otandyq kompanııalaryń sybaılas jemqorlyqqa qarsy súıemeldeýdiń barysy jáne kásipkerlerden kelip túsken ótinishter men oń sheshimin tapqan máseleler týraly jobalyq keńseniń jaýapty mamany, Departamenttiń Sybaılas jemqorlyq profılaktıkasy basqarmasynyń bas mamany Erbol Jumabaı baıandady.
Májilis depýtaty Záýresh Amanjolova depýtattar tobynyń Mańǵystaý óńirine is-saparynyń maqsaty men mindetterin túsindirip ótti. Depýtat halyqpen kezdesýde, Agenttikten jáne onyń aýmaqtyq departamentteri tarapynan, Ádep jónindegi keńes múshelerinen zań jobasy aıasynda usynys-pikirler kútetinderin aıtty.
Jıynda sóz alǵan 1991-1993 jyldarda QR Joǵarǵy keńesi tóraǵasynyń orynbasary bolǵan, QR Parlamenti Májilisiniń eks-depýtaty (1997-2004 jyldary), memlekettik qyzmet ardageri, Ádep jónindegi keńesiniń múshesi Qaırolla Erejepov qoldanystaǵy memlekettik satyp alý týraly zańnamaǵa turǵyndardan túsken usynystardy nazardan tys qaldyrmaı basshylyqqa alý qajettigi týraly pikirin bildirdi.
Májilis depýtaty Ýálıhan Qaınazarov qazirgi qoldanystaǵy memlekettik satyp alýlar týraly zańnamadaǵy ózgeristerge toqtalyp, ol zańdy qabyldaý barysyndaǵy atqarylǵan jumystar týraly toqtalyp ótti.
Sondaı-aq jınalǵandar memleket basshysyna engiziletin Qazaqstan Respýblıkasynyń sybaılas jemqorlyqqa qarsy is-qımyl týraly ulttyq baıandama jobasynyń Qazaqstandaǵy sybaılas jemqorlyqqa qarsy saıasatynyń ózekti strategııalyq maqsattary men mindetteri, elimizdiń áleýmettik-ekonomıkalyq damýyna yqpaly jáne sybaılas jemqorlyqqa qarsy is-qımyl salasyndaǵy zańnamany jetildirýi týraly negizgi baǵyttarymen tanysyp, oı talqysyna saldy. Halyq qalaýlylary bolsa óz kezeginde mańǵystaýlyqtardy Elbasy Joldaýyndaǵy sybaılas jemqorlyqqa qarsy is-qımyl baǵytyndaǵy basymdyqtardy júzege asyrýǵa qoǵamnyń barlyq áleýmettik toptarymen birlesip jumys isteýge shaqyrdy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
