Jurtshylyq bir-birin jubata júrip kóz jumǵan sábıler úshin Alladan duǵa tilep, olardyń ata-anasyna, aǵaıyn-týystaryna kóńil aıtyp, sabyrly bolýǵa shaqyrýda, qoldarynan kelgen kómegin usynyp, ózderiniń shynaıy nıetterin bildirýde. Qaraly otbasyna Memleket basshysy N.Nazarbaev kóńil aıtty. Sondaı-aq Úkimet músheleri, depýtattar men ortalyq memlekettik organdardyń, saıası partııalardyń, azamattyq qoǵamnyń ókilderinen bastap qarapaıym jurtshylyqqa deıin kóńil aıtýda.
Parlament Senatynyń tóraǵasy Q.Toqaev óziniń Týıtterdegi paraqshasynda: «Astanadaǵy órttiń saldarynan bes balanyń qaza bolǵany týraly qaraly habar qabyrǵamdy qaıystyrdy. Bul naǵyz qasiret. Qaza bolǵandardyń týystaryna qaıǵyryp kóńil aıtamyn» deı kele, bul oqıǵa tıisti memlekettik organdarǵa jáne jalpy qoǵamymyzǵa sabaq bolýy tıistigin atap kórsetti.
Al «Nur Otan» partııasy Tóraǵasynyń birinshi orynbasary Máýlen Áshimbaev: «Rasymen, bes birdeı búldirshinniń qapyda qaza bolýy tutas halyqtyń qabyrǵasyn qaıystyryp jiberdi. О́kinishten ózegimiz órtenedi. Biraq amal joq. Endi osyndaı qasirettiń qaıtalanbaýy úshin áreket etýimiz kerek, – dep jazdy Feısbýk áleýmettik jelisinde. – Bul jaıt qoǵamdaǵy keıbir ózekti máselelerdiń kezek kúttirmeı sheshýdi qajet etetinin kórsetip berdi. Shyn máninde, kóp balaly otbasylarǵa júıeli qoldaý kórsetý, jumys isteıtin analarǵa laıyqty jaǵdaı jasaý jáne balalar quqyǵyn qorǵaý máselesinde áli de bolsa jetildiretin tustardyń bar ekeni sózsiz. Sondyqtan da halyqtyń járdemaqy, baspana máselesine qatysty aıtyp, jazyp jatqan sózderi oryndy. Osyǵan oraı «Nur Otan» partııasy bul baǵyttarda naqty usynystar daıyndaýda. Aldaǵy ýaqytta sol boıynsha Úkimetpen birlesip jumys istep, jaǵdaıdyń jaqsarýyna ózimizdiń úlesimizdi qosamyz dep senemin. Sonymen birge partııa janynan Balalar quqyǵyn qorǵaý jónindegi keńes qurý týraly sheshim qabyldanǵanyn jetkizgim keledi. Osy baǵytta da búkil qoǵam bolyp jumylyp, óskeleń urpaqtyń jarqyn bolashaǵy jolynda birlesip jumys isteıik».
Árıne, «tas túsken jerine aýyr». Sondyqtan kóz jumǵan sábılerdiń ata-anasynyń qandaı kúı keshkenin sózben aıtyp jetkizý qıyn. Ony bárimiz túsinemiz.
Qabyrǵany qaıystyryp, jas óskinderdi jalmap ketken bul oqıǵa Astanada bolǵandyqtan, qala ákimi Baqyt Sultanov Úkimet otyrysynda baqytsyzdyqqa dýshar bolǵan otbasyna jan-jaqty qoldaý men kómek jasalatynyn málimdedi.
– Búginde Astana qalasy ákimdigi tarapynan tıisti barlyq járdem berilýde. Arnaıy komıssııa quryldy. Qazir ata-analarymen de jumys istep jatyrmyz. Odan ári qandaı járdem kórsetiletindigi kelesi sharalarda sheshimin tabady. Jan-jaqty kómek kórsetiledi, – dedi qala ákimi. Onyń aıtýynsha, osy ispettes jaǵdaılardyń aldyn alý úshin aýdan ákimderine, tótenshe jaǵdaılar departamentiniń, polısııa departamentiniń basshylaryna birlesip túngi reıd júrgizý jumystary tapsyryldy. Al kúndizgi barlyq ot jaǵyp otyrǵan jer úıler men nysandardaǵy turǵyndarǵa órt qaýipsizdigi erejelerin saqtaý túsindirilip, tekserý júrgizý jumystary jalǵasady.
Aıta keteıik, Astana qalasy Kóktal-1 shaǵyn aýdany Shyńǵystaý kóshesinde bolǵan órtten qaza tapqan búldirshinderdiń úlkeni 13-te, al eń kishisi úsh aılyq bolǵan. Qaza bolǵan balalardyń ákesi Tehnıkalyq qyzmet kórsetý stansasynda isteıdi eken. Túnde jumys berýshisi ony shuǵyl istermen jumys ornyna shaqyrtyp alǵan. Al polıetılen kásiporyndarynyń birinde isteıtin anasy túngi aýysymda bolypty. О́rtengen úı balalardyń anasynyń úlken apasyna tıesili kórinedi. О́rttiń shyǵý sebepteri anyqtalýda.
«Qaıǵyny bólisse azaıady» degen halqymyz osy kúnderi bir kisideı yntymaq tanytyp, qara jamylǵan otbasyna rýhanı qoldaýdan bólek, materıaldyq kómek uıymdastyrýǵa da jumyla kirisip jatqanyn atap ótý kerek. Mysaly, QMDB tóraǵasynyń birinshi orynbasary, naıb múftı Naýryzbaı qajy Taǵanuly Astanadaǵy «Áziret Sultan» meshitiniń uıymdastyrýymen jınalyp jatqan qarajatqa baspana alyp beriletinin aıtty. Budan bólek, túrli deńgeıli mekemelerden, meshitterden, jekelegen azamattardan bes búldirshinniń ata-anasynyń esep-shotyna qarjy salyp jatqan, bir kúndik eńbekaqysyn aýdarýǵa asyqqan azamattardyń qarasy qalyń. Osy rette «Egemen Qazaqstan» gazetiniń ujymy da qara jamylǵan otbasynyń qaıǵysyna ortaqtasyp, kóńil aıtady jáne bir kúndik jalaqylaryn esep-shotyna aýdarady. Jaratýshy ıemiz kúnásiz baldyrǵandardyń aldarynan jarylqasyn, ata-anasyna sabyr bersin.
Joldybaı BAZAR,
«Egemen Qazaqstan»
