Qazir munda 200-den astam adam eńbek etedi. Sehtar jańartylyp, zamanaýı qurylǵylar ornatylǵannan keıin óndiris kólemi eki esege, ónim túrleri 30 prosentke ulǵaıyp, qosymsha 50 jumys orny ashyldy. Bıyl óńirlik Indýstrııalandyrý kartasy sheńberinde 894 mıllıon teńgeniń jobasy júzege asyrylady.
«Plastık buıymdar shyǵarýmen 2002 jyldan beri aınalysyp kelemiz. Halyq tutynatyn taýarlar jáne turǵyn úı-kommýnaldyq sharýashylyǵyna qajetti qubyrlar men metall ónimderin óndiretin keshen iske qosylyp, óndiris oryndary túgelge jýyq avtomattandyryldy. «Bıznestiń jol kartasy–2020» baǵdarlamasy sheńberinde sehtar ozyq tehnologııalarmen jabdyqtaldy» deıdi metall-plastık zaýytynyń dırektory Evgenıı Lı.
Munda shyǵarylatyn ónim túrleri san alýan. Saptyaıaq, shelek, shara, ilgeshek, kıim keptirgish, útikteýge arnalǵan taqtalar sekildi turmysta keń qoldanylatyn zattardyń kez kelgen túri bar. Sapasy sheteldik balamalardan esh kem emes. Jergilikti shıkizat paıdalanylatyndyqtan baǵasy da qoljetimdi.
Kásiporyn óziniń dıstrıbıýsııalyq jelisi arqyly ónimderin Qazaqstannyń barlyq óńirimen qatar Reseıdiń birqatar qalasyna jóneltedi.
О́mir ESQALI,
«Egemen Qazaqstan»
Soltústik Qazaqstan oblysy
