06 Aqpan, 2019

Medısınalyq bilimniń bolashaǵy Almatyda talqylandy

284 retkórsetildi

Búgin 4-6 aqpan kúnderine belgilengen Almaty qalasyndaǵy «Zamanaýı medısınalyq bilim berý salasyndaǵy sapa, úzdiksiz jetildirý jáne benchmarketıng» halyqaralyq semınary aıaqtalady.  

Búgingi tańda bolashaq dárigerlerdi oqytýdy  jańa satyǵa kóterý – zaman talabyna aınaldy. Sondyqtan onyń birden bir tásili – emhana, aýrýhanalarmen birigip jumys isteý.

– Semınardyń basty maqsaty – HHI ǵasyrdyń jańa suranysyna saı, elimizde medısınalyq bilim berý isin durys jolǵa qoıý. Sondaı-aq dárigelerdiń jańa tehnologııany ıgerýi, emdelýshilermen jumys isteýi, jańa tehnologııalar men ádisterdi qoldanýy jáne olardan qandaı nátıje kútetinimizdi de talqylap alaıyq dedik. Osy jolda ýnıversıtetter men aýrýhanalardyń ıntegrasııasyn kúsheıtýimiz kerek, sodan soń elimizdiń úzdik ǵylymı ınstıtýttary bazasynda ýnıversıtettik klınıkalar qurýǵa kóshemiz. Osy jolda biz dárigerler daıyndaýdy burynǵy ádisten qazirgi  zamanaýı standartqa kóshirý úshin medısınasy jaqsy damyǵan Malaızııa, Lıtva elderin tańdadyq. Bul elder burynnan-aq bizdiń strategııalyq áriptesterimiz bolyp tabylady. Alaıda endi biz olarmen birige otyryp bolashaq medısına mamandaryn daıarlaıtyn ortaq baǵdarlama jasaýdy josparlap otyrmyz. Sol boıynsha aldaǵy 2-3 jylda medısına mamandaryn 7-9 jyl emes, 6 jyl oqytatyn júıege kóshkimiz kelip otyr, – dedi QR densaýlyq saqtaý vıse-mınıstri Oljas Ábishev.

– Benchmarkıng degenimiz – mine, osy. Iаǵnı, bir emes, birneshe eldiń tájirıbesin salystyra otyryp, jaqsysyn, qolaılysyn alý. «Mysaly biz Fransııa medısınasynyń tájirıbesin Qazaqstanǵa engize almaımyz.  Sebebi Fransııanyń kólemi shaǵyn, biz odan tórt-bes ese kelemiz. Soǵan baılanysty bizde dárigerler basqasha daıarlanýy kerek. Feldsherlik ashyq pýnktter desek, olar Avstralııa, Kanada sııaqty úlken elderge tán nárse. Shaǵyn elderge onyń qajet joq. Sondyqtan biz kóptegen elderdiń tek jaqsy degen tájirıbelerin ala otyryp, benchmarkıng arqyly erekshe óz modelimizdi qurǵymyz keledi» – dedi vıse-mınıstr jýrnalısterge bergen arnaıy suhbatynda.

Úsh kúnge sozylatyn semınar-trenıng aıasynda qazirgi zamanǵy bilim berýdiń ózekti máseleleri – sapa fılosofııasy, oqytýshynyń róli men quzyrettiligi, baǵalaý ádisteri jáne t.b. qarastyryldy. Sonymen qatar, semınar spıkerleri, professor Vishna Devi Nadaraja jáne Doktor Azizi Ayob fokýs-toptarda jumys isteý kezinde medısınalyq joǵary oqý oryndarynda jeke keńester men kezdesýler barysynda sapany qoldaý máselelerinde ádistemelik jáne is júzindegi tájirıbelik kómek kórsetti.

Halyqaralyq jıyndy uıymdastyrýǵa QR Densaýlyq saqtaý mınıstrliginiń qoldaýymen «QDSJM» Qazaqstandyq medısına ýnıversıteti uıytqy boldy.

Aınash ESALI,

«Egemen Qazaqstan»

ALMATY

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar