Kóshe boıynda (Áńgime)

Qala kósheleriniń biri. Asqar ketip bara jatyr. Ádemi kıingen. Kó­ńil kúıi qalypty. Biraq asyǵys. Jan-jaǵyndaǵy adamdarǵa mán berip qaramaıdy. Birinen soń birinen ozyp keledi.

Ekinshi aıaldamadan ótkende júrisi oǵashtaý qyz balany qýyp jetti. Shalbarynyń yshqyry túsińki, ústindegi kıimi kir. Bir jaǵyna qaraı qısaıyp, aıaǵyn syltyp basyp barady. Asqar oza bere qyzǵa eriksiz nazaryn aýdar­dy. Tómen qarap bara jatqan qyz­dyń júzinen aqyl-esi kem eke­nin baıqady. Denesi titirkenip ketti. Tez-tez basqan kúıi, aldyna qa­rap júrip ketti. Kóńilin kirbiń shal­ǵandaı. Biraq artyna burylyp qaraǵan joq. Telefonyna bir kóz salyp qoıyp, júre berdi.

Bir mezgilde Asqar týra artynan syltyp basqan aıaq alys­ty estigendeı boldy. Biraq jalt burylyp artyna qaraýdy oılaǵan da joq. Ile-shala álgi aıaq alys týra janynan estildi. Aýrý qyz kúlip, Asqardan ozyp bara jatyr eken. Asqardyń júrisi baıaýlap, qyz oza bergende birjola toqtap qaldy. Ári tańǵalǵan, ári shoshyǵan kúıde qazdıdy da qaldy. Biraýyq qyzdyń sońynan qarap turdy da, joldyń kelesi betine shyǵyp, ári qaraı júrip ketti. Alaıda, artyna qaramastan máz bolyp ketip bara jatqan qyzǵa kózi túse berdi. Uzyn kóshe taýsylar emes.

Asqardyń kóńili álem-tapyryq boldy. Bir kezde kúrt sheshim qabyl­dady da, joldyń qyz ketip bara jatqan betine qaıta ótip, adymdaı basyp, qyzdan ozyp ketti. Asqar ozyp bara jatqanda qyz aýzy qısaıyp, daý­sy durys shyqpaı, býlyǵyp kúlip máz boldy. Asqar da jymıdy. Biraq qyzdyń betine týra qaraýǵa júregi daýalamady.

Asqar júrisin baıaýlatty. Qyz bir aıaǵymen jerdi syzyp-syzyp ketetin júrisimen entigip, Asqardan ozyp ketip taǵy kúldi. Kúlkisi murny bitip qalǵan adamdikindeı. Asqar jáne bir ret ozdy. Sóıtip qyzǵa ozýǵa taǵy bir múmkindik berdi. Qyz ozyp ketken soń ornynda turyp qaldy da, qyzǵa «áı» dep aıqaılap belgi beredi. Qyz qaraǵan joq. Asqar ysqyrdy. Qyz endi qarady. Kúlimsireı qarady. Asqar qolyn bulǵap, men bylaı júremin degendeı oń jaqty nusqady. Qyz kóńili túskendeı boldy. Sodan soń qolyn bulǵap jymıdy.

Asqar sholaq kóshemen buryldy da, úıdi aınalyp tasada turyp qaldy. Jylarman kúıde tur. Qyzdy aıady. Ári onyń kúlgenine qýanǵan sııaqty. Túsiniksiz hal. О́mirdiń baıan­syzdyǵyna kóz jetkendeı sezim.
Qyz Asqar ketken jaqqa qarap tur.

Arman ÁLMENBET