Kóńilinde bir muń bar edi...
Kenet kóz ushynan buldyrap kóringen kógildir taýlar kúlimsirep, shatqal-shatqaldaǵy qaraǵaılar men shyrshalar qol bulǵap, al odan berirektegi kúrkiregen asaý ózenniń arnasynan qońyrsalqyn, janǵa jaıly lep esip, ishki saraıy tazaryp, jeńildep qalǵandaı boldy.
Betkeı-betkeıdegi aq jumyrtqadaı kıiz úılerdiń mańaıyndaǵy qazan-oshaq, sarǵysh jez samaýryn, órege jaıylǵan sóre-sóre qurt, arsha kúbi, jelidegi qulyn, ózen boıyna arqandalǵan kúreń bıe – bári-bári biregeı úndestik taýyp, sen ańsaǵan tynysh ta taza dúnıe osy emes pe edi dep shaqyratyndaı.
Sodan soń álgi úılerdiń qyr jelkesindegi bir túp alma aǵashy men jaly kúdireıip, shurqyraı kisinep qyrǵa qaraı órip bara jatqan bir úıir jylqy tipti kóz tartyp, kóńilin eleńdetip, qıqý salyp júgire jónelgisi keldi.
Onyń bar ǵoı, onyń... taza aýa jutqysy keldi, qymyz ishkisi keldi simirip.
Qazan-oshaq jaqtan shyqqan súr ettiń ıisi tanaýyn qytyqtady. Sary samaýrynǵa qarap ta, appaq qurtqa qarap ta tamsandy. Ystyq-ystyq shaı iship, talmap-talmap malta sorǵysy keldi.
Al jelidegi qulyn baıaǵyda-a, osydan júz jyl buryn joǵaltqan balalyq shaǵyn esine saldy. Kúrkirep aqqan asaý ózenniń shetindegi qoıtastarǵa jabysyp, sup-sýyq sýǵa bir súńgip alǵysy keldi. Sosyn erni-ernine tımeı, qaltyrap-dirildep kelip kúnshýaqqa, kókmaısanyń ústine aýnap jata ketkisi keldi.
Taǵy bir sátte kúreń atqa qarǵyp minip, quıǵytyp shaba jónelmekshi bolyp edi...
Kenet tý syrtynan aqyryn ǵana: «Alasyz ba?» dep ún qatqan kelinshektiń daýsy oıyn bólip jiberdi.
Iаpyr-aý, jańa ǵana eliktirip, jan dúnıesin sıqyrlap alǵan kórkem dúnıe áp-sátte keneptegi kartınaǵa aınalyp ketipti.
«Oý, men Arbatta... ıá, ıá, Almatydaǵy Arbatqa qoıylǵan kartınalar galereıasynyń aldynda tur ekenmin ǵoı!» degen oı túrtip ótti sanasyn.
Kún bolsa, shaǵyrmaq edi. Appaq qarǵa shaǵylysyp, jalt-jult etip jatqan-dy. Mezgil bolsa, qys ortasy. Qaladaǵy ári-beri aǵylǵan jurttyń ashyq alańdaǵy galereıaǵa qaıyrylyp, bir sát kóz toqtatyp qaraýǵa da murshasy joq-ty.
Al álgi kartınalardy satyp turǵan orta boıly, tyǵynshyqtaı kelinshek aıaz soryp qyzarǵan ıegin paltosynyń jaǵasyna tyǵyp, búrisip, buıyǵyp turyp: «Alasyz ba?» dep suraıdy aqyryn ǵana.
Ol da, uıalǵan bolar sirá, aqyryn ǵana ún qatyp: «Qansha turady?» dep surady. «Qyryq myń teńge, – dedi kelinshek. – Ýstýpka jasaýǵa bolady, aǵaı...»
Ol túsiniksizdeý keıipte basyn shaıqady. Bul onyń «ala almaımyn» degeni me, joq álde, ózi umyta bastaǵan tań-tamasha tabıǵat aıasyndaǵy tirshilikti kórip, tańǵalǵany ma, kim bilsin, áıteýir, sol kúıi jumbaq bolyp qaldy...
Nurǵalı ORAZ,
«Egemen Qazaqstan»
