AQSh Qorǵanys mınıstrliginiń qaýip-qaterdi azaıtý jónindegi agenttiginiń bólim dırektory Kolder Stıven Rıchard jáne onyń áriptesteri jergilikti polısııa departamentinde ótken kezdesýge qatysty. Meımandar murajaıdy aralap, jedel basqarý ortalyǵynyń jabdyqtalýymen tanysty.
Qazaqstandyq polısııanyń qurylý tarıhymen tanysqan áskerı qonaqtar erekshe áserge bólendi. Kolder Stıven Rıchard estelik kitapqa «...ár dáýirden syr shertetin eksponattardyń tupnusqasy, olardyń sıpattamasy, ekspozısııalar tarıhqa degen qurmetti kórsetedi. Qyzmet atqarý kezinde qaza tapqan qyzmetkerlerge, ekinshi dúnıejúzilik soǵysty máńgi este saqtaýǵa erekshe kóńil bólingen. Sizderdiń murajaıyńyz jáne onyń saqtaýshylary el tarıhy týraly estelikterdi molynan jınastyrǵany baıqalady», degen jyly tilekke toly qoltańba qaldyrdy.
Sheteldik qonaqtar jedel basqarý ortalyǵynyń jumysyna joǵary baǵa berdi. Polısııa ýchaskelerine 1140 kamera ornatylǵan. Onyń bir bóligi oblys ortalyǵyndaǵy 13 ýchaskelik polısııa pýnktine tikeleı qosylǵan. Qoǵamdyq qaýipsizdik sharalarymen mektepter, aýrýhanalar da qamtamasyz etilgen.
Polısııa departamentiniń bastyǵy, polısııa general-maıory Berik Bilálov AQSh áskerılerin aldaǵy jumys josparymen tanystyryp, krımınaldyq ahýaldyq qalypty ekenin jetkizdi.
Sheteldik delegasııa Ulttyq ulan Petropavl áskerı ınstıtýtynda da bolyp, is-tájirıbeler almasty.
О́mir ESQALI,
«Egemen Qazaqstan»
Soltústik Qazaqstan oblysy
