«Tiliksiz ota» jasaý sheberleri Aqtaýǵa jıyldy
Sársenbi, 5 qyrkúıek 2012 7:22
Adam densaýlyǵyn saqtaý – memlekettik saıasattyń basym baǵyttarynyń biri. Sondyqtan elimizde osy salanyń mamandaryna álemdik medısınanyń ozyq úlgilerin ıgere otyryp, óz elimizdegi densaýlyq saqtaý men emdeýdi damytý mindeti qoıylyp otyr.
Sársenbi, 5 qyrkúıek 2012 7:22
Adam densaýlyǵyn saqtaý – memlekettik saıasattyń basym baǵyttarynyń biri. Sondyqtan elimizde osy salanyń mamandaryna álemdik medısınanyń ozyq úlgilerin ıgere otyryp, óz elimizdegi densaýlyq saqtaý men emdeýdi damytý mindeti qoıylyp otyr.
Sońǵy jyldardyń ózinde Qazaqstannyń biraz óńirlerindegi aýrýhanalar sheteldik qural-jabdyqtarmen qamtyldy. Medısınanyń ár salasyna qatysty zamanaýı ózgerister men jańalyqtar otandyq dárigerlerdiń qoldanysyna dendep engizilýde. Mysaly, ota jasaý, bizdińshe, pyshaqqa túsý. Alaıda, qazir jetilgen medısınalyq ádister pyshaqsyz da ota jasaýǵa bolatyndyǵyn dáleldep keledi. Mamandar málimetine súıensek, álemde jyl saıyn jasalatyn birneshe mıllıon endohırýrgııalyq otalar barysynda burynǵy úlken tilikti, jaraqatty otalardyń ornyna shaǵyn tesik arqyly jasalatyn otalar qoldanyla bastaǵan. Otashy dáriger adamnyń ishperde qýysyna jáne keýdesine óte jińishke aspappen ota jasaıdy, al ish qýysyndaǵy ol kórinis optıkalyq aspap arqyly monıtordan kórinip turady. Úlkeıtip jáne anyq kórsetetin aspap arqyly sol múshede qandaı ózgerister bar, neni qalaı sylyp tastaý kerek nemese qalaısha ota jasaǵan jón – bári alaqandaǵydaı. Jaraqaty az mundaı otalardyń naýqasqa tıimdiligin aıtpaǵanda, jańa tehnologııany engizýdiń kosmetıkalyq, medısınalyq jáne ekonomıkalyq jaǵynan artyqshylyǵy aıqyn sezilip keledi eken. Jańa endohırýrgııalyq tehnologııa hırýrgııamen shektes gınekologııa, onkologııa, otorınolorıngologııa, ýrologııa, qan tamyr hırýrgııasy, travmatologııa jáne ortopedııada keńinen qoldanyla bastaǵan.
Aqtaýda ótken Qazaqstannyń endoskopıst hırýrgteri qaýymdastyǵynyń kezekti II sezi osy tehnologııanyń tıimdiligin arttyrýǵa, Reseı, Ýkraına, Qyrǵyzstan, Tájikstan, О́zbekstan, Ázerbaıjan, Grýzııa, Germanııa, Fransııa otashy dárigerleriniń ózara tájirıbe almasýyna arnaldy. Sezge qatysqan otashy dárigerler sheberlik sabaqtaryn ótkizdi. Endohırýrgııa kafedrasynyń professorlary men dosentteri – professor S.Toqpanov, professor I.Kotlobovskıı, professor O.Ospanovtar júrgizgen sabaq barysynda oblystyq aýrýhana bazasynda laparaskopııalyq hırýrgııa ádisimen ish qýysyn qarap, asqazan jáne soqyr ishekti sylyp alý otasy 3D translıasııasy arqyly jasaldy.
«Budan 20 jyl buryn tiliksiz ota jasaý degen frazany jurt tek fılıppındik hımerler isi dep túsinetin. Tipti, naǵyz maman dárigerler úshin de kúrdeli hırýrgııalyq otalardy kishkene tesik arqyly jasaý aqylǵa qonymsyz kórinetin. Búginde bul tásil ádisteme jetistikteriniń qatarynda. Elimizdegi alǵashqy laparoskopııalyq ota táýelsizdik alǵan jyldary boldy, odan beri bul ádis naryqtyń da, daǵdarystyń da tezinen ótip, kúnnen-kúnge jetilip keledi», – deıdi Qazaqstannyń endoskopıst hırýrgteri qaýymdastyǵynyń prezıdenti, professor Oral Ospanov.
Osylaısha, bizdiń dárigerler sheteldik áriptesterin Qazaqstanǵa jıyp, tájirıbe almasty. Bul dástúrli qalypqa túsip, jyl saıyn uıymdastyrylmaq. Úırengeniniń jemisi kádege jarasa, halyqqa keregi – sol.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
