Bul jóninde Batys Qazaqstan oblystyq Qoǵamdyq keńes otyrysynda esep bergen óńir basshysy Altaı Kólginov habarlady. Keıbir sırek mamandardy daıyndaý úshin oblys bıýdjetinen 16 mln teńge bólinip, búginde 28 batysqazaqstandyq elimizdiń túrli medısınalyq joǵary oqý ornynda bilim alyp jatyr. Al 20 maman «Alma University» fılıalynyń oqý-klınıkalyq bazasynyń magıstratýrasynda oqıdy.
Batys Qazaqstan oblysy – elimiz boıynsha medısına salasynda qaǵazsyz qujat aınalymyna aldymen kóshken óńirdiń biri. Búginde osy saladaǵy 121 túrli qujat tolyǵymen elektrondy formatqa kóshirilgen. О́ńirdegi ár adamnyń elektrondy densaýlyq tólqujaty bar. 22 myń turǵyn «k-vrachu.kz» mobıldi qosymshasyn qoldanady. Medısına mekemelerinde «Kazmedinform» aqparattyq júıesi, elektrondy kezek jáne jedel járdemge arnalǵan «ADIS» avtomatty júıesi engizilgen.
- Osyndaı júıeli jumystyń nátıjesinde 2016-2018 jyldar aralyǵynda ana ólimi – 67%-ǵa, sábı shetineýi – 20%-ǵa, qaterli isikke shaldyǵý – 6%-ǵa azaıdy. Memleket pen jekemenshiktiń áriptestigi arqasynda oblystyq klınıkalyq aýrýhanaǵa magnıtti-rezonansty tomografııa apparatyn aldyq. Shyńǵyrlaý aýdanynyń Aqshat aýylynda jańa dárigerlik ambýlatorııa salyndy, - dedi Altaı Kólginov.
Sonymen birge Oral qalasynda Kardıoortalyqtyń jańa ǵımaratynyń qurylysy bastalmaq.
Qazbek QUTTYMURATULY,
«Egemen Qazaqstan»
Batys Qazaqstan
