- Keshtiń maqsaty aýǵan soǵysy ardagerlerine qurmet kórsetý, jat jerde kóz jumǵan jerles azamattardy eske alý jáne jastarǵa patrıottyq tárbıe berý bolyp tabylady,-dedi Abaı atyndaǵy kitaphananyń damytý bóliminiń ádiskeri Svetlana Saıagýb.
Kezdesýge ómiriniń ólsheýli bir bóligin, jalyndaǵan jastyq shaǵynyń jartysyn oq pen ot arasynda ótkizip, elge aman-saý oralyp, týǵan jerimen qaýyshqan ınternasıonalıst-jaýyngerler, atap aıtqanda Boranbaı Begatov, Sovet Aıtbaev, Vıktor Kazakov, Edil О́mirtaevtar qatysty. Shara eń aldymen 71 jasynda dúnıeden ótken, SSSR kezinde Aýǵanstanda sovet kúshteriniń arnaıy maqsattaǵy tobyn basqarǵan, «qara maıor» laqap atymen áıgili bolǵan Borıs Kerimbaevty jáne aýǵan soǵysynda erlikpen qaza tapqan bozdaqtardy 1 mınýt únsizdikpen eske alýmen bastaldy.
Kesh shymyldyǵyn jastar men óskeleń urpaqqa áskerı-patrıottyq tárbıe berýdiń erekshe úlgisin kórsetip júrgen, Qazaqstan Respýblıkasy Qarýly Kúshteri ofıserleriniń bir býynyn tárbıelegen áskerı ofıser Aleksandr Martynov ashty.
- Aýǵan soǵysynyń ardagerleri Aýǵanstandaǵy áskerı qyzmeti týraly esteliktermen bólisti. Árbir jaýynger-ınternasıonalıstiń áńgimesi men dembel albomynan alynǵan fotosýretteri kórsetilgen beınerolıkter qatysýshylarymyzǵa ıgi áser etti,-dedi Abaı atyndaǵy kitaphananyń damytý bóliminiń ádiskeri Svetlana Saıagýb,- is-sharamyzǵa qatysýshy Geologııalyq barlaý kolledji, «Qaınar» kolledji men «Radıotehnıka jáne baılanys» kolledjderiniń stýdentteri derekti ocherktermen de tanysty. Fotoalbomdardy paraqtap kórip, aýǵan soǵysy jaýyngerleri týraly merzimdi basylymdardan usynylǵan jazbalardy oqyp kórdi. Aýǵan joldarymen ótken jerles jas sarbazdardyń erlikteri týraly baıandaıtyn «Aýǵan soǵysy tarıhynyń betteri» atty kitap kórmesi de jastarǵa erekshe áser etti.
Kezdesý barysynda Shoqan Ýálıhanov atyndaǵy «Jas Ulan» erler lıseıiniń tárbıelenýshileri, Tatar óner mektebiniń, «Kazakı Prıırtyshıa» halyq horynyń oryndaýlarynda beıbitshilik, dostyq týraly patrıottyq ánder shyrqaldy.
Kórmeni Semeı qalasynyń áskerı Dańq murajaıy usynǵan jaýynger-ınternasıonalısterdiń jeke qujattarynan, zattarynan arnaıy ákelingen ekspozısııa tolyqtyrdy.
-Aýǵan soǵysy – júrekte jazylmaıtyn, tarıhta oryn alatyn erekshe better,-deıdi Svetlana Saıagýb,- oq pen ottyń ortasynan oralǵan ardagerler úshin Aýǵanstan jazylmas jan jarasyna aınaldy. Aýǵan soǵysy on ekide bir gúli ashylmaǵan bozdaqtardyń qanymen jazylǵan tarıh dep biledi keıingi jas býyn ókilderi. Jyldar jyljyp ótkenimen, erlikpen qaza tapqan erjúrek jaýyngerlerimizdiń erligi el esinde máńgi saqtalady. Sondyqtan da jas býynǵa aýǵan ardagerleriniń ójettigin úlgi etý, aýǵan soǵysynda opat bolǵan jaýyngerlerdiń rýhyna taǵzym etýge, esimderin qasterleýge tárbıeleý árqaısymyzdyń qasıetti boryshymyz.
Raýshan NUǴMANBEKOVA,
«Egemen QAZAQSTAN»
SEMEI
