«Qazaq eli bizge qut meken boldy»
Sársenbi, 18 sáýir 2012 8:14
Memleket basshysynyń Qazaqstan halqy Assambleıasynyń kezekti sessııasyn shaqyrý týraly Jarlyǵy shyqqannan keıin, arada birer aptadaı ýaqyt ótkende «Respýblıkalyq uıǵyr mádenı ortalyǵy» qoǵamdyq birlestiginiń tóraǵasy Ahmetjan Shardınovpen habarlasyp, elimizde etnosaralyq yntymaqtastyqtyń bekem ornyǵýyna úles qosyp júrgen azamattardyń birimen jolyqqymyz keletinin jetkizgen edik. Ol kisi birden Qazaqstan halqy Assambleıasynyń múshesi Abdýreshıt Mahsutovtyń esimin atady. «Abdýreshıt qazir jumystarmen Astanada júr, – dedi ol sózin jalǵastyryp. – Jolyqqyńyz kelse, uıaly telefonynyń nómirin aıtaıyn…».
Sársenbi, 18 sáýir 2012 8:14
Memleket basshysynyń Qazaqstan halqy Assambleıasynyń kezekti sessııasyn shaqyrý týraly Jarlyǵy shyqqannan keıin, arada birer aptadaı ýaqyt ótkende «Respýblıkalyq uıǵyr mádenı ortalyǵy» qoǵamdyq birlestiginiń tóraǵasy Ahmetjan Shardınovpen habarlasyp, elimizde etnosaralyq yntymaqtastyqtyń bekem ornyǵýyna úles qosyp júrgen azamattardyń birimen jolyqqymyz keletinin jetkizgen edik. Ol kisi birden Qazaqstan halqy Assambleıasynyń múshesi Abdýreshıt Mahsutovtyń esimin atady. «Abdýreshıt qazir jumystarmen Astanada júr, – dedi ol sózin jalǵastyryp. – Jolyqqyńyz kelse, uıaly telefonynyń nómirin aıtaıyn…».
Biz Abdýreshıt Mahsutovpen erteńinde elordadaǵy kórikti demalys oryndarynyń biri – «Astana-Báıterek» kesheniniń mańynda jolyqtyq. Jón surasyp, tanysqan soń:
– Sharýalarym bitkennen keıin «Báıterekke» kóterilip, Astananyń búgingi ajar-kórkin tamashalaýdy josparlaǵan edim, – dedi ol kún nurymen shaǵylysyp, jalt-jult etken «Báıterektiń» ushar basyndaǵy beıbitshilik sımvoly ispetti «jer sharyna» qarap. – Eger qarsy bolmasańyz, birge kóterileıik.
«Báıterekten» elordanyń kórnekti jerleri, onda boı kótergen ǵımarattar túgelge jýyq kórinedi. Osylarǵa bir sát qyzyǵa qarap, sholyp shyqqan Abdýreshıt:
– Bir múshel jas aralyǵynda osynshama ǵımarattar, kóp qabatty turǵyn úıler salý, shynynda da, úlken erlik qoı, – dedi ol súısingen qalyp tanytyp. – Meniń oıymsha, bul – Elbasymyzdyń kóregendigi, batyldyǵy. Ekinshiden, búkil qazaqstandyqtardyń arasynda berik ornyqqan yntymaqtastyqtyń jemisi…
Elimizde etnosaralyq birlik jarasym tapqan. Sonyń nátıjesinde halyqtyń ál-aýqaty jaqsardy, elimizdiń ekonomıkasy jedel qarqynmen damyp keledi. Munyń túp negizinde ózara syılastyq, aýyzbirshilik, bolashaqqa degen senim jatyr. Etnosaralyq yntymaqtyń saltanat quryp, birliktiń nyǵaıýyna úles qosyp júrgen azamattardyń biri – osy Abdýreshıt Mahsutov.
– Uıǵyrlar – taǵdyry qıyn óte eńbekqor halyq, – dep jalǵastyrdy sózin áńgimelesýshimiz. – Qytaıdyń Qulja qalasynda dúnıege kelgenmin. Ata-anam ótken ǵasyrdyń alpysynshy jyldary Qazaqstanǵa qonys aýdarǵan eken. Qazaq eli bizge qut meken boldy. Bilim aldyq, ınstıtýt bitirdik, ósip-óndik, túrli etnos ókilderimen birge tatý-tátti eńbek ettik. Eshkim bizdi syrtqa tepken joq. Táýelsizdiktiń alǵashqy jyldaryndaǵy el basyna túsken bar aýyrtpalyqty birge kóteristik. Al qazir egemen elimizdiń damýyna hal-qaderimizshe úles qosyp jatqan jaıym bar.
Keńes Odaǵy ydyrap, onyń quramyndaǵy respýblıkalar óz táýelsizdigin alǵannan keıingi qıyndyqqa toly alǵashqy jyldar esimizde. Sol elderdiń birqatarynda ultaralyq kıkiljińder oryn alyp, onyń sońy janjaldarǵa ulasqanyn, myńdaǵan beıbit turǵyn bosqynǵa ushyraǵanyn bilemiz. Bir jaqsysy, Qazaqstanda ondaı jaǵdaılarǵa jol berilmedi. Sóz arasynda Abdýreshıtten sol bir jyldary óziniń qandaı oıda bolǵanyn suradym.
– Ázerbaıjan men Armenııadaǵy ultaralyq qaqtyǵystar, Tájikstandaǵy, О́zbekstandaǵy janjaldar, shynymdy aıtsam, bizdiń elde de boı kórsete me dep úreılendik, – dedi Abdýreshıt Mahsutov. – Taǵdyrymyzǵa alańdap, ári-sári kúı keshtik. Beıbit ómirdiń bárinen de qymbat ekenin túsindik. Prezıdentimiz Nursultan Nazarbaevtyń danalyǵynyń arqasynda orny tolmas ókinishterge soqtyratyn kıkiljińderge jol berilmedi. Elbasymyz elimizdegi barlyq etnostardyń basyn biriktirdi, birlik pen yntymaq berekege bastaıtyn birden-bir týra jol ekenin boıymyzǵa sińirdi. Búgin sonyń shapaǵatyn kórip otyrmyz.
Abdýreshıt Mahsutov Respýblıkalyq uıǵyr etnomádenı ortalyǵy janyndaǵy Jigitbasy keńesiniń tóraǵasy bolyp qoǵamdyq jumys ta atqarady eken. Onyń aıtýynsha, 2010 jyldyń qazanynda qazaqstandyq uıǵyrlardyń tarıhynda alǵash ret uıǵyr jigitbasylarynyń quryltaıy ótipti. Bul jıynǵa 500-den astam adam qatysqan. Sonda kópshilik A.Mahsutovty Jigitbasy keńesiniń tóraǵalyǵyna saılapty. Jıyndy uıymdastyrýǵa bas-kóz bolǵan, oıdaǵydaı ótýine atsalysqan taǵy osy Abdýreshıt eken.
– Sol jıynǵa qatysýshylar elimizde turatyn barlyq uıǵyrlarǵa úndeý qabyldady. Onda Memleket basshysynyń ishki jáne syrtqy saıasattaǵy bastamalaryna qoldaý bildire otyryp, olardy el arasynda keńinen nasıhattaý, jastardy yntymaqta ómir súrýge tárbıeleý birinshi kezekke qoıylǵan, – dedi ol osy jóninde. – Sondaı-aq, úndeýde toı ótkizý men qaıtys bolǵan adamdy sońǵy saparǵa shyǵaryp salýda ysyrapshyldyqqa jol bermeý, mádenı-rýhanı is-sharalarǵa belsendi qatysý, taǵy basqa da máseleler kórsetilgen.
Áńgimelesý barysynda biz Abdýreshıtten sodan bergi ýaqytta Jigitbasy keńesi qandaı sharalardy júzege asyrýǵa uıytqy bolǵanyn suraǵan edik.
– Kásipkerlikpen aınalysyp, elimizdiń órkendeýine ózindik úles qosyp júrgen uıǵyr azamattary az emes, – dedi A.Mahsutov. – Olar qandaı da bir sharalardan eshqashan syrt qalmaıdy. Mysaly, 2010 jyly Jigitbasy keńesiniń músheleri Almaty oblysy, Uzynaǵash aýylynda oryn alǵan tabıǵat apatynan zardap shekkenderdiń esep-shotyna jalpy kólemi 11 mıllıon 670 myń teńge aýdardy. Sondaı-aq, ótken jyly biz Ońtústik Qazaqstan oblysynyń sý basqan eldi mekenderine jáne Almaty oblysy, Uıǵyr aýdanyndaǵy Sharyn aýylynyń turǵyndaryna qarjylaı da, materıaldyq ta kómekter kórsettik. Mysal úshin aıtaıyn, Sharyn aýylyna 110 tonna kómir jetkizip berdik.
Qazaqstan halqy Assambleıasynyń múshesi, kásipker Abdýreshıt Mahsutov jetekshilik etetin Jigitbasy keńesiniń músheleri saıası naýqan – Prezıdent jáne Parlament saılaýlarynda Memleket basshysynyń saıasatyn, «Nur Otan» halyqtyq-demokratııalyq partııasynyń saılaýaldy tuǵyrnamasyn halyq arasynda nasıhattaý sharalaryna belsene aralasypty. Sonymen qatar, ol «Ýıǵýr avazı» gazetiniń dostary» klýbynyń prezıdenti retinde basylym oqyrmandary qatarynyń kóbeıýine demeýshilik kórsetip otyrady eken.
– Taǵy da qaıtalap aıtaıyn, – dedi ol qoshtasar sátte, – qasıetti Qazaq dalasy bizge qut meken boldy. Kóńili darqan qazaq halqy baýyryna tartyp, qoldaý-kómek kórsetti. Osy yntymaǵymyz ár kez jarasym taba bersin.
Álısultan QULANBAI.
