Aıta keterligi, eki komanda Shyǵys konferensııasy kóshbasshylyǵyna talasyp keledi. Astanadaǵy osy kezdesýde «Barys» jeńiske jetken jaǵdaıda bıyl bul konferennsııada qaı komandanyń jeńimpaz atanatyny túbegeıli sheshiletin edi. Bıyl bizdiń komanda «Avangardtan» aılasyn asyra almaı keledi. Qurlyqtyq hokkeı lıgasynda buǵan deıin eki komanda úsh márte kezdesti. Barlyǵynda ombylyq klýb jeńiske jetti. «Barys» sol ketken eseni búgin qaıtarýǵa kúsh saldy. Esepti birinshi bolyp astanalyq hokkeıshiler ashty.
Bizdiń komanda sapynan 11-mınýtta Vıktor Svedberg mergendik tanytty. Alaıda ony ustap tura alǵan joq. Úshinshi kezeńniń 49-mınýtynda «Avangard» hokkeıshisi Nıkıta Pıvsakın tarazy basyn teńestirip ketti. Oıyn sońyna dein osy esep ózgergen joq. Kezdesý overtaımǵa ulasty. Onda da jeńimpaz anyqtala qoıǵan joq. Býllıtte «Avangard» komandasynyń joly boldy.
Atalmysh jeńilisine qaramastan «Barys» Shyǵys konferensııasyndaǵy ornyn saqtap qaldy. Osylaısha astanalyq klýb atalmysh qarsylasynan tórtinshi márte jeńildi. «Barys» buǵan deıin 12 aqpanda Astanada Novosibirdiń «Sıbır» komandasynan 5:2 esebimen basym tústi. Odan keıin 14 aqpanda Qytaıdyń «Kýnlýn Red Star» komandasynan 3:1 esebimen jeńdi. Endi «Barys» aldaǵy úsh kezdesýin syrt aıdynda ótkizedi. Aldymen 18 aqpanda Vladıvostokta «Admıral», 20 aqpanda Habarovskide «Amýr» komandalarymen oınaıdy.
Qurlyqtyq hokkeı lıgasyndaǵy sońǵy kezdesýin «Barys» Qytaıdyń «Kýnlýn Red Starmen» 22 aqpanda ótkizedi. Odan keıin jarystyń pleı-off kezeńi bastalady.
