Dárigerlerden mundaı tosyn syıdy kútpegen balalar alǵashynda: «Hımııa terapııa taǵy bola ma?», «Ine qashan?» degen úreımen qarsy alǵan. Al dárigerler kishkentaı emdelýshilerdi aýrýdyń aldynda kúresker bolýǵa shaqyryp, sonda ǵana ony jeńýge bolatynyn erekshe áreketpen túsindirdi. Osy jolda dárigerdi dos dep qabyldaýǵa úgittedi.
Densaýlyq saqtaý mınıstrliginiń málimetinshe, jyl saıyn shamamen 600 balada obyr aýrýynyń dıagnozy anyqtalady eken. Balalarǵa bul qıyndyqty jeńýge ádette ata-analary men dárigerler kómektesedi. Bul joly eriktiler de qoldaýdan tys qalmady. Joǵaryda atalǵan kóńildi bı «Help Today» qoǵamdyq qory volonterleriniń kómegimen júzege asyrylǵan. Qor dırektory Elmıra Alıeva: «Bul balalarǵa mereke boldy. Alǵashynda olar bıshi-dárigerlerdi kórip, qaıran qaldy. Balalar dárigerlerdi únemi ınesimen, túrli qorqynyshty quraldarymen kóretindikten, olarǵa úrkip qaraıdy. Biraq bul joly basqasha boldy. Balalar dárigerlermen birge bıledi», deıdi.
Qor densaýlyq salasyna qatysty ıgi istermen aınalysady. Ondaǵy ujym, budan bólek, qaterli isikpen aýyratyn balalardy qoldaý retinde «Men – jeńimpaz» jobasyn uıymdastyrypty. Ol jobada erte jasta osyndaı dertke shaldyǵyp, ony jeńip shyqqan naqty keıipkerler týraly beınerolıkter jasalǵan. «Bul balalar men olardyń ata-anasyna saýyǵyp ketýge senim syılaýdy kózdeıdi. Máselen, bir beınerolıktegi Abdýllam Alın qazir 20 jasta. Ol qaterli isikti ómirinde 2 ret jeńgen. 3 jáne 5 jasynda Pedıatrııa jáne balalar hırýrgııasy ǵylymı ortalyǵynda kúrdeli em alǵan. Keıipkerimiz búginde JOO-da oqıdy, sportpen shuǵyldanady ári ózge emdelýshilerdi jeńiske jetýge ıtermeleıdi», deıdi E.Alıeva.
Dárigerlerdiń kóńildi bıi túsirilgen vıdeony Elmıra áleýmettik jelidegi paraqshasyna jarııalaǵan. Onda balalardyń bir sát aýrýyn umytyp, shattyqqa bólengenin kórýge bolady.
Aıdana ShOTBAIQYZY,
«Egemen Qazaqstan»
