Jalpy bilim beretin pánder boıynsha QR Bilim jáne ǵylym mınıstrliginiń qoldaýymen «Daryn» respýblıkalyq ǵylymı-praktıkalyq ortalyǵy ótkizgen baıqaý jıyrma jyl qatarynan jalǵasyn taýyp keledi. Bıylǵy jylǵy baıqaý barysynda ǵylymı jobalardy qorǵaýdyń ashyqtyǵy barynsha qamtamasyz etilip, seksııalar jumysy onlaın-rejımde ótti. Osyǵan oraı atalǵan mınıstrlik jáne «Daryn» ortalyǵynyń áleýmettik jelilerdegi akkaýnttaryndaǵy beıne-kórsetilimder 18 seksııa boıynsha 131 891 ret qaraldy.
Ǵylymı zertteýler baıqaýynyń ashylý saltanatynda sóz sóılegen QR BǴM vıse-mınıstri Elmıra Sýhanberdıeva respýblıka óńirlerinen jınalǵan talantty balalardyń sany jyldan-jylǵa artyp kele jatqandyǵyna qýanyshyn bildirip, bul baıqaýdyń ádil deńgeıde ótetindigine senim artqan-dy. Ári budan burynǵy aıtylǵan kemshilikterdi boldyrmas úshin baıqaýdyń onlaın rejımde qadaǵalanatyndyǵyn atap ótken bolatyn. Baıqaý barysynda fızıka-matematıka ǵylymynyń doktory, professor, UǴA akademıgi Muhtarbaı О́telbaev barlyq qatysýshylar úshin baıqaýǵa qatysýdyń ózi joǵary mártebe ekenin ári búgingi jastar otandyq ǵylymnyń keleshegi, dep atap ótse, tarıhı eskertkishter men týrıstik baǵyttar boıynsha jobanyń jetekshisi tarıh ǵylymdarynyń doktory, professor Jáken Taımaǵambetov «Respýblıkanyń ár óńirinen kelgen, ozyq jetistikteri bar oqýshylar úshin úlken alańda saıysý árıne ońaı emes. Degenmen de qazylar alqasy ádil baǵasyn aıtýǵa kúsh saldy»,- dedi óz sózinde.
Oqýshylardyń ǵylymǵa degen qyzyǵýshylyǵyn arttyrý maqsatynda «Ǵylymı-tehnıkalyq progress – ekonomıkalyq ósýdiń negizgi býyny», «Ekonomıkalyq jáne áleýmettik prosesterdi matematıkalyq modeldeý», «Taza tabıǵı orta – Qazaqstan - 2050 strategııasyn iske asyrýdyń negizi», «Qazaqstannyń tarıhı eskertkishteri jáne bolashaq damýy bar saıahat baǵdarlary» sııaqty tórt baǵytta ótken bilim dodasynda jeńimpazdardy anyqtaýǵa otandyq joǵary oqý oryndarynyń pedagog-ǵalymdary atsalysty.
Konkýrstyń qorytyndy kezeńine oraı respýblıkanyń barlyq óńirlerinen úzdik dep tabylǵan 625 joba usynylyp, 811 daryndy oqýshylar irikteldi. Osylaısha úzdik oqýshylar baq synasyp, 773 jas zertteýshi 601 ǵylymı jobalaryn qorǵady.
Konkýrstyń «Úzdik komanda» ataǵy jáne gran-prı ıegeri Nazarbaev Zııaterkerler mektepteriniń komandasyna berildi. Al komandalyq birinshi oryndy Almaty qalasy, ekinshi oryndy Pavlodar oblysy ıelense, úshinshi oryndy Jambyl jáne Shyǵys Qazaqstan oblystary bólisti. QR Bilim jáne ǵylym mınıstrliginiń I dárejeli dıplomdary jáne altyn medaldarmen 49 jobany daıyndaǵan 60 jeńimpaz, II dárejeli dıplomdary jáne kúmis medaldarmen 79 joba boıynsha 103 júldeger, III dárejeli dıplomdary jáne qola medaldarmen 130 joba boıynsha 176 júldeger marapattaldy.
Konkýrs qorytyndysy boıynsha jeńimpazdar elimizdiń qurama komandasy qatarynda 12-17 mamyr aralyǵynda Fenıks qalasynda - Arızona shtatynda jyl saıyn ótetin «Intel ISEF-2019» oqýshylardyń halyqaralyq ǵylymı jobalar konkýrsynda óz jumystaryn usynatyn bolady.
Konkýrstyń jeńimpazdary men júldegerleriniń tizimin https://daryn.kz/olympiads/view/4/2904 ciltemesi arqyly kórýge bolady.
Elvıra Serikqyzy,
«Egemen Qazaqstan»
ALMATY
