Táýelsizdik alǵan kezden beri Qazaqstan aıtýly jarysqa úzdiksiz qatysyp keledi. 13 márte uıymdastyrylǵan álem chempıonattarynda otandastarymyz 9 márte jeńis tuǵyryna kóterildi. Tarqatyp aıtsaq, 3 altyn, 2 kúmis jáne 4 qolany qorjynǵa saldyq. Barlyǵy – 9 júlde. Bizdiń shańǵyshylar arasynan Vladımır Smırnovtyń shoqtyǵy bıik boldy. Ol 1993 jyly Shvesııanyń Falýn qalasynda qos kúmis pen bir qola medaldi ıelengen edi. Smırnov 10 shaqyrymdyq klassıkalyq jáne 10 shaqyrymdyq erkin tásilde máre syzyǵyn ekinshi bolyp qıyp ótse, 30 shaqyrymdyq klassıkalyq ádiste úshinshi orynǵa taban tiredi.
1995 jyly Kanadanyń Tander-Beı qalasynda 3 altyn jáne 1 qola medaldi oljalaǵan Qazaqstan quramasy jalpy komandalyq esepte tórtinshi satyǵa jaıǵasty. Aldymyzda tek qysqy sport túrleriniń alpaýyttary – Reseı, Norvegııa jáne Japonııa. Bul júldelerdiń barlyǵyn áıgili shańǵyshy Vladımır Smırnov jeńip aldy.
Dańqty Vladımır Smırnov úlken sporttan qol úzgennen keıin Qazaqstannyń shańǵyshylary uzaq jyldar boıy eńse tikteı almady. Túrli dodalarda bizdiń sportshylar júlde alyp júrgenimen, tórtkúl dúnıeniń myqtylary bas qosqan jarysta jer sıpap qaldy. Máselen, 1997-2011 jyldar aralyǵynda uıymdastyrylǵan segiz birdeı baıraqty básekeden quralaqan oraldyq. Tek 2013 jylǵy álem chempıonatynda týymyz qaıta bıikte jelbiredi. Italııanyń Val-dı-Femme qalasynda uıymdastyrylǵan álem chempıonatynda 50 shaqyrymdyq mass-startta Alekseı Poltoranın qola medaldi moınyna ilse, dál sol Poltoranın óziniń komandalyq áriptesi Nıkolaı Chebotkomen birge 6h1,5 shaqyrymdyq erkin tásildegi komandalyq sprıntte de úshinshi oryndy enshiledi.
Mine, sodan beri baqandaı alty jyl ótti. 2015 jylǵy álem chempıonaty Shvesııanyń Falýnynda ótse, 2017 jylǵy dodany Fınlıandııanyń Lahtı qalasy qabyldady. Osy jarystyń ekeýinde de komandalyq esepte Norvegııa men Germanııa kósh bastady. Shvesııada úshinshi orynǵa jarys qojaıyndary taban tirese, Sýomı elinde reseılikter sol mejeden kórindi. О́kinishke qaraı, osy jarystardyń ekeýinde de jerlesterimizdiń joly bolmaı, elge eńseleri túsken kúıde oraldy. Endi taıaý kúnderi Aýstrııanyń Zefeld-ın-Tırol qalasynda bastalatyn dúbirli dodada sol olqylyqtyń orny tolady dep úmittenemiz.
Ǵalym SÚLEIMEN,
«Egemen Qazaqstan»
