Aı basynan bastalǵan is-shara barysynda tártip saqshylary ártúrli quqyq buzýshylyqqa qatysty 400-den astam jasóspirimdi ishki ister bólimderine jetkizgen. Balalaryn tárbıeleý jónindegi mindetterin oryndamaǵany úshin 10 ata-ana, túngi ýaqytta kámeletke tolmaǵandardyń oıyn-saýyq oryndarynda bolýyna jol bergen 14 oıyn-saýyq ıeleri ákimshilik jaýapkershilikke tartyldy.
Sondaı-aq ıývenaldy polısııa qyzmetkerleri túngi ýaqytta oıyn-saýyq oryndarynda bolǵan 20 jasóspirim jáne túnde zańdy ókilinsiz turǵyn úıden tys jerlerde júrgen 345 kámeletke tolmaǵandardy anyqtady. Quqyq buzýshylyqqa beıim 45 jasóspirim jáne 43 qolaısyz otbasy esepke alynǵan. Jasóspirimder qylmysyn azaıtý jáne kámeletke tolmaǵandar arasynda quqyq buzýshylyqtardy boldyrmaýdyń aldyn alý maqsatynda, oblys ákiminiń bastamasymen ári qoldaýymen mektepterde beınekameralar paıdalanylatyn qanatqaqty joba qolǵa alyndy. Mysaly, Túrkistan qalasyndaǵy №23 orta mektep ǵımaratyna jáne aýlasyna polısııa departamentiniń jedel basqarý ortalyǵymen ıntegrasııalanǵan 5 beınebaqylaý kamerasy ornatylǵan. Qazir tártip saqshylary balalardyń qaýipsizdigin jáne mektep oqýshylarynyń ortasyndaǵy qandaı da bolmasyn quqyq buzýshylyqtar áreketin baqylaı alady. Mundaı beınebaqylaý kameralaryn búgingi tańda 39 myńnan astam bala bilim alatyn Túrkistan qalasynyń barlyq mektebinde ornatý josparlanýda.
Jasóspirimder arasynda quqyq buzýshylyqtyń aldyn alý jumystary Maqtaaral aýdanynda da kúsheıtilýde. Bul oraıda ata-analarǵa arnalǵan konferensııa ótkizilip, aýdan ákimi B.Asanov balalar men jasóspirimder arasyndaǵy quqyq buzýshylyqtyń aldyn alý boıynsha atqarylyp jatqan jumystar týraly baıandady. «Búgingi tańda mektep jasyndaǵy balalardyń bos ýaqytyn tıimdi paıdalaný maqsatynda aýdannyń barlyq mektebinde «senim jáshikteri» ornatyldy. Bilim berý mekemelerindegi ata-analar jınalysynyń kún tártibine «qıyn» balalarmen jumysty qolǵa alý jáne oqý jyly barysynda olardy osy kategorııadan shyǵarý máselesi qoıyldy. Ádistemelik keńester berildi. Bul kúnderi árbir mekteptegi «qıyn» balalardy esepke alyp, olardyń júris-turysy, minez-qulqy, sabaq úlgerimin baqylap, der kezinde pedagogıkalyq-psıhologııalyq kómek berý úshin mekteptegi psıholog, tálimgerler men dırektordyń orynbasarlary bekitilip, arnaıy baǵdarlama boıynsha jumys júrgizilýde. Budan bólek, ákimshilik bekitken arnaıy keste boıynsha ishki saıasat, aýdandyq ishki ister bólimi men aýdandyq bilim bólimi, BAQ ókilderi jáne mektep muǵalimderimen birigip, keshki mezgilde reıd júrgizýde. Beımezgil ýaqytta júrgenderdi anyqtap, eskertý jasaýda», dedi aýdan ákimi. Sondaı-aq konferensııa barysynda jaryssózge shyqqandar óz usynystaryn bildirdi.
Ǵalymjan ELShIBAI,
«Egemen Qazaqstan»
Túrkistan oblysy
