«О́zderińiz kórip otyrsyzdar, Elbasynyń Jastar forýmynda bergen tapsyrmalarynyń bári de asa mańyzdy jáne olar óz deńgeıinde oryndalatyn bolady. Osy tusta, myna jaıtqa da toqtalǵym keledi. Bul - aýyl jastarynyń máselesi. Shyny kerek, osy jerde otyrǵan kóbimiz aýyldan shyqtyq. Aýyl - Qazaqstannyń altyn besigi, biz úshin sakraldy týǵan jer. Jastar jylynda biz aýyl jastary máselesin jan-jaqty sheshýdiń joldaryn qarastyryp jatyrmyz.
Onyń ishinde, Elbasy aıtqandaı, «Dıplommen - aýylǵa» baǵdarlamasy arqyly aýylǵa barǵan jastardyń alǵashqy járdemaqysy 100 aılyq eseptik kórsetkishke ósip otyr», - dedi mınıstr. Onyń sózine qaraǵanda, vedomstvo aýylǵa baratyn jas mamandar úshin arnaıy kásiporyndarda kvotanyń sanyn ulǵaıtý, bilim granttaryn kóbeıtý máselesin qarastyryp jatyr. «Aýyldyq jerdegi ınfraqurylymdy jańartý, jańa jumys oryndaryn, medısınalyq-mádenı oshaqtardyń qurylysyn salý Aýmaqtyq damý josparlaryna naqty engizilýi qajet dep esepteımiz.
Sondaı-aq, «Serpin», «Jas maman», «Jas kásipker» baǵdarlamalarynyń maqsaty bir - aýyl jastarynyń ahýalyn jaqsartý. Árıne, búgingideı ýrbanızasııalyq, sıfrlyq, joǵary tehnologııalyq dáýirde eshkimdi aýylǵa baılap otyra almaısyń. Alaıda, tym bolmaǵanda, aýyldyń áleýmettik-ekonomıkalyq jaǵdaıy qalamen teńese bastaıtyn bolsa, aýyldyń oty eshqashan óshpeıdi dep oılaımyn!», - dedi Darhan Káletaev.
