«Eger áıel osy elde óziniń isin ashqysy kelse, Birikken arab ámirlikteriniń úkimeti ony kez kelgen elge jiberip oqytady, onyń qarjysyn tóleıdi. Sonymen qatar áıel-kásipkerlerge salyq jeńildikteri jasalǵan. Osy meni qyzyqtyrdy» deıdi Evgenııa.
Qostanaılyq kásipker áıel qatysqan forýmǵa arabtyń bıznes-hanymy, mıllıoner Rııd Ál-Dhaherı demeýshilik jasady. Evgenııa oǵan óziniń atelesinde tigilgen sáýkeleni syılady. Qostanaılyq sheberlerdiń qolynan shyqqan qazaq áıeliniń ulttyq bas kıiminiń sándiligi forýmǵa qatysýshylardy tań qaldyrdy. Evgenııaǵa arab áıelderiniń tikken kıimderi de unady.
«Bul er adamdar qatyspaǵan, áıelder paraja kımegen jabyq shara boldy. Olar tikken kóılekter óte sándi eken. Men onda ulttyq stıldegi kıimderdiń birikken kórmesine shaqyrtý aldym. Bul bolashaq isker baılanysymyzdyń basy bolar dep úmittenemin» deıdi Evgenııa.
Osy saparda Birikken arab ámirlikteriniń Isker áıelderi keńesi men Qazaqstan Isker áıelderi keńesi yntymaqtastyq memorandýmyna qol qoıdy. Onyń aıasynda bolashaqta birikken jobalar men baǵdarlamalar jasalatyn bolady. Árıne, odan qostanaılyq kásipker áıelder de syrt qalmaıdy.
Názıra JÁRIMBET,
«Egemen Qazaqstan»
Qostanaı
