Barlaýshy
Sársenbi, 9 mamyr 2012 7:38
Ámirbek Qoıshybekuly maıdannan kelgen soń túrli ulttyń toǵyz balasyn baýyryna basyp ósirgen
…Bir aıaǵyn maıdan dalasyna qaldyryp, elge oralǵan Ámirbek Qoıshybekuly úıine kirip kelgende kózderi jáýdiregen ár ulttyń balalaryn kórip, tań-tamasha boldy. О́shkeni janyp, ólgeni tirilgendeı bolyp jatqan anasy Ultýdyń qushaǵynda turǵanda da qos janaryn kógenkózderden alar emes.
Sársenbi, 9 mamyr 2012 7:38
Ámirbek Qoıshybekuly maıdannan kelgen soń túrli ulttyń toǵyz balasyn baýyryna basyp ósirgen
…Bir aıaǵyn maıdan dalasyna qaldyryp, elge oralǵan Ámirbek Qoıshybekuly úıine kirip kelgende kózderi jáýdiregen ár ulttyń balalaryn kórip, tań-tamasha boldy. О́shkeni janyp, ólgeni tirilgendeı bolyp jatqan anasy Ultýdyń qushaǵynda turǵanda da qos janaryn kógenkózderden alar emes.
Másele bylaı bolypty. Bul soǵysqa attanǵan soń, sheshesi jer aýyp kelgen toǵyz birdeı jetim balany qamqorlyqqa alyp, úıine panalatady. Sonda birinshi aýzy júretin keıbir áıelder syrtynan: «Ultýdyń asyrap alǵan balalarynyń ishinde nemis te bar eken. Onysy nesi, ári-beriden keıin orys pa, cheshen be, qarashaı deı ma, qaıdaǵy ulttyń balalaryn baǵatyn zaman ba?» dep ósekti zýlatyp ta jatty. Mundaı sózdi Ámirbektiń de qulaǵy shalady.
«Qan maıdanda bútindeı keńes jaýyngerleri bolyp, jaýǵa bir atanyń balasyndaı atoı salǵan joqpyz ba?! Barlaýǵa Shámil esimdi cheshen jigitimen talaı ret birge baryp, «til» ákelip edik qoı. Otan úshin janyn berýge bar edi-aý azamat. Myna omyraýymdaǵy III-dárejeli «Dańq» ordendi sol jaýynger dosyma da berip edi. Sońǵy shaıqasta aýyr jaralanyp, es-tússiz jatqanda rota komandıri, orys ultynyń ókili Merzlakov ózi ıt tartqan sanıtar shanasyna salyp, gospıtalǵa jetkizgenin, sonda bir aıaqty kestirgenimmen jaryq dúnıege qaıta kelgenimdi myna jurt qaıdan bilsin».
Sanasyn osyndaı oı sharlap ótken jaraly jaýynger biri balasynan, biri baýyrynan, endi biri qosaǵynan aıyrylǵan muńdyqtarǵa ne desin. Orys, nemis, cheshen, qarashaı, barlyǵy toǵyz ulttyń balasyn asyrap alǵan anasynyń adamgershilik qasıetine rıza boldy. Alǵashqy kúnnen balalardy ish tartyp, jany qalmady. Birine bas kıimin, endi birine beldigin, taǵy birine jeıdesin úlestirip berdi.
Jyldar jyljyp ótip jatty. Anasy baqılyq bolǵan. Álgi saıasattyń jazyqsyz jas jelkenderi de eseıdi. Maıdanger azamat olardy óz balalarynan kem kórmeı, tárbıelep, ósirdi. Jeteýi keıinnen balalar úıine ótti de, ekeýi osy úıde júrip, otaý qurdy. Sanaly azamat bolyp qalyptasqan soń, ardager ókil ákelerine óz qursaǵynan shyqqandaı analyq meıirimin tókken maıdangerdiń jary Dárikúl apalaryna alǵystaryn jaýdyryp, jan-jaqqa kete bardy.
Soǵystan bir aıaǵyna «aǵash» baılap qaıtqanyna qaramaı ataqty «Talas» qarakól qoı sovhozynda ár salada jemisti eńbek etti. Beıbit ómirde de marapatty az alǵan joq.
Ata-anasyz tul jetim qalǵan balalardy baýyryna basqanyn qudireti kúshti bir Alla kórdi me, tektilik qasıetinen aınymaı 90 jyl ǵumyr keshti.
Kempiri ekeýine jaratqan eki qyz ben eki ul berdi. Tuńǵyshtary Bıbijan men odan keıingi Jańylǵany ózderiniń sanaly ǵumyrlaryn urpaq tárbıesine jáne saýda salasyna arnady. Ekeýi de zeınette. Biri Qarataý, endi biri Taraz qalasynda turady. Uldyń úlkeni Sultan oblys ortalyǵyndaǵy «Temir jol jylý» kásipornynda dırektordyń orynbasary, balalardyń kenjesi Serik Almatyda qurylys fırmasyn basqarady.
Maıdangerdiń balalary ata-ana rýhyna baǵyshtalatyn quranyn úzgen emes. Jeńis kúni de Aqkól aýylynda ákeleriniń 100 jyldyǵy men analarynyń 95 jyldyǵyna taǵzym etip, túrli mádenı sharalar ótkizedi.
Amangeldi ABYLAShULY, jýrnalıst.
Jambyl oblysy.
