Qalalyq qurylys jáne turǵyn úı saıasaty basqarmasynyń basshysy Rýslan Ahmetov ákimdik otyrysynda «Nurly jer» jáne «Nurly jol» memlekettik baǵdarlamalaryn júzege asyrý barysy týraly aıtty. Rýslan Ahmetovtyń habarlaýynsha, Astanada atalmysh memlekettik baǵdarlama aıasynda basqarma bilim berý, turǵyn úı qurylysy jáne ınjenerlik-kommýnıkasııalyq ınfraqurylymdy damytý salasyndaǵy ınvestjobalardy júzege asyrdy.
«Nurly jol» ınfraqurylymdyq damý memlekettik baǵdarlamasyn júzege asyrý aıasynda 2015-2017 jyldar aralyǵynda Ulttyq qordan nysanaly transfertter esebinen ınvestısııalyq jobalardy salýǵa 9 mlrd teńge, onyń ishinde turǵyn úı qurylysyna 634 mln teńge (qosymsha qarjylandyrý), bilim berý salasyna 3,5 mlrd teńge, ınjenerlik-kommýnıkasııalyq ınfraqurylym qurylysyna 4,8 mlrd teńge bólindi. Qazirgi ýaqytta memlekettik baǵdarlamany iske asyrý aıaqtaldy», – dedi vedomstvo basshysy.
Sonymen qatar, qalany damytýdyń keshendi josparyna sáıkes «Nurly jer» memlekettik turǵyn úı qurylysy baǵdarlamasyn iske asyrý aıasynda turǵyn úılerdiń qurylysy jalǵastyrylmaq. Osy maqsattarǵa esepti kezeńde 34 mlrd teńge kóleminde memlekettik ınvestısııa baǵyttaldy. Aǵymdaǵy jyly 1 261 páterge arnalǵan jalpy aýdany 90,8 myń sharshy metr jalǵa beriletin turǵyn úı qurylysy jalǵastyryldy, 2019 jyly aýmaǵy 59,1 myń sharshy metr bolatyn 731 páter paıdalanýǵa beriledi. Sonymen qatar, aǵymdaǵy jyly josparly kórsetkishterge sáıkes jalpy aýdany 15,5 myń sharshy metr 188 páterlik turǵyn úı qurylysyn bastaý josparlanǵan.
«Kredıttik turǵyn úı qurylysy» baǵyty boıynsha «Báıterek Development» AQ-nan qarajatty qaryzǵa alý boıynsha ákimdik oblıgasııalaryn shyǵarý arqyly turǵyn úı qurylysy júzege asyrylýda. Osy baǵyt boıynsha baǵdarlamany iske asyrý bastalǵannan beri búgingi tańda jalpy aýdany 103 myń sharshy metr bolatyn 1 351 páter paıdalanýǵa berildi.
«Aǵymdaǵy jyldyń bekitilgen josparlaryna sáıkes osy baǵyt boıynsha biz 1 575 páterlik 138,4 myń sharshy metr turǵyn úı qurylysyn jalǵastyrdyq. Aǵymdaǵy jyldyń sońyna deıin 653 páterlik 57,7 myń sharshy metr turǵyn úı paıdalanýǵa beriledi», – dep atap ótti R. Ahmetov.
Aǵymdaǵy jyly jetkizilgen lımıtter sheńberinde jalpy aýdany 32,1 myń sharshy metrdi quraıtyn 392 páterli nesıelik turǵyn úı qurylysy bastalady. Sonymen qatar, 10,6 ga jer ýchaskeleri boıynsha baǵdarlamany odan ári iske asyrý maqsatynda jergilikti bıýdjet qarajaty esebinen jalpy kólemi 120 myń sharshy metr bolatyn 1 688 páterlik bes kóppáterli turǵyn úı keshenin jobalaý bastaldy.
«Turǵyn úı qurylysynyń qarqynyn saqtaý úshin biz memlekettik ınvestısııa esebinen baǵdarlama aıasynda júzege asyrylatyn turǵyn úı qurylysy aýdandaryn ınjenerlik-kommýnıkasııalyq ınfraqurylymmen qamtamasyz etemiz», – dep atap ótti qalalyq qurylys jáne turǵyn úı saıasaty basqarmasynyń basshysy.
